മലയാളികളുടെ അടുക്കളത്തോട്ടത്തിലെ ‘സൂപ്പർഫുഡ്’ വിദേശത്ത് നിരോധിതം! കാരണം അറിയാം

മലയാളികളുടെ അടുക്കളത്തോട്ടത്തിലെ സ്ഥിരം സാന്നിധ്യമായ മുരിങ്ങയ്ക്ക് ഓസ്‌ട്രേലിയയിലും ന്യൂസീലൻഡിലും വാണിജ്യ വിലക്ക്. മുരിങ്ങയില, മുരിങ്ങക്കായ, മുരിങ്ങയെണ്ണ എന്നിവ ഭക്ഷണമായോ ഭക്ഷ്യചേരുവകളായോ ഇറക്കുമതി ചെയ്യുന്നതിനും വിൽക്കുന്നതിനുമാണ് ഫുഡ് സ്റ്റാൻഡേർഡ്സ് ഓസ്‌ട്രേലിയ ന്യൂസീലൻഡ് നിയന്ത്രണം ഏർപ്പെടുത്തിയത്. 2026 ഏപ്രിൽ 8 മുതൽ ഉത്തരവ് പ്രാബല്യത്തിലായി. മുരിങ്ങ മനുഷ്യന്റെ ആരോഗ്യത്തിന് സുരക്ഷിതമാണെന്ന് ഉറപ്പിക്കുന്ന മതിയായ ശാസ്ത്രീയ തെളിവുകൾ സമർപ്പിക്കാൻ കഴിഞ്ഞിട്ടില്ലെന്നതാണ് നിരോധനത്തിന് പ്രധാന കാരണം. ഇതോടെ മുരിങ്ങയെ ‘നോവൽ ഫുഡ്’ വിഭാഗത്തിൽ ഉൾപ്പെടുത്തി. 1994-ന് മുൻപ് ഓസ്‌ട്രേലിയയിലും ന്യൂസീലൻഡിലും മുരിങ്ങ വ്യാപകമായി ഭക്ഷണമായി ഉപയോഗിച്ചിരുന്നതിന് ആവശ്യമായ രേഖകളില്ലെന്നതും തീരുമാനത്തെ സ്വാധീനിച്ചു.

ഇതോടെ മുരിങ്ങപ്പൊടി ചേർത്ത സ്മൂത്തികൾ, ഹെൽത്ത് ഡ്രിങ്കുകൾ, മറ്റ് ഭക്ഷ്യ ഉൽപ്പന്നങ്ങൾ എന്നിവയുടെ വാണിജ്യ വിൽപ്പനയ്ക്കും ഇറക്കുമതിക്കും നിയന്ത്രണമുണ്ടാകും. നിരോധിത ഉൽപ്പന്നങ്ങൾ അതിർത്തിയിൽ പിടിച്ചെടുക്കുകയോ നശിപ്പിക്കുകയോ ചെയ്യുമെന്ന് ഓസ്‌ട്രേലിയൻ കൃഷി, മത്സ്യബന്ധനം, വനം വകുപ്പ് മുന്നറിയിപ്പ് നൽകിയിട്ടുണ്ട്. നിയമം ലംഘിച്ചുള്ള ഇറക്കുമതി കുറ്റകരവുമാണ്. എന്നാൽ ഈ നടപടി മലയാളി പ്രവാസികൾക്ക് വീട്ടിലെ മുരിങ്ങമരം ഉപേക്ഷിക്കേണ്ട സാഹചര്യമുണ്ടാക്കില്ല. സ്വന്തം പറമ്പിൽ മുരിങ്ങ നട്ടുവളർത്തുന്നതിനും ഇലയും കായും സ്വകാര്യ ആവശ്യങ്ങൾക്കായി പാകം ചെയ്ത് കഴിക്കുന്നതിനും വിലക്കില്ല. വാണിജ്യപരമായ ഭക്ഷ്യവിൽപ്പനയ്ക്കാണ് നിയന്ത്രണം. അതേസമയം, തെറാപ്പ്യൂട്ടിക് ഗുഡ്സ് അഡ്മിനിസ്ട്രേഷനിൽ ആവശ്യമായ രീതിയിൽ രജിസ്റ്റർ ചെയ്തിട്ടുള്ള മുരിങ്ങ അടങ്ങിയ ഔഷധ സപ്ലിമെന്റുകൾക്ക് പ്രത്യേക വ്യവസ്ഥകളോടെ വിപണിയിൽ തുടരാം.

2019-ൽ ബ്രസീലും മുരിങ്ങ ഉൽപ്പന്നങ്ങൾക്ക് നിയന്ത്രണം ഏർപ്പെടുത്തിയിരുന്നു. കാൻസർ, പ്രമേഹം തുടങ്ങിയ രോഗങ്ങൾ ഭേദമാക്കുമെന്ന ശാസ്ത്രീയ അടിത്തറയില്ലാത്ത അവകാശവാദങ്ങൾ ഉന്നയിച്ച് ഉൽപ്പന്നങ്ങൾ വിറ്റഴിച്ചതായിരുന്നു അന്നത്തെ നടപടിക്ക് പിന്നിൽ. അതേസമയം, വെള്ളത്തിലെ മൈക്രോപ്ലാസ്റ്റിക് മലിനീകരണം കുറയ്ക്കുന്നതിൽ മുരിങ്ങവിത്തുകൾക്ക് സാധ്യതയുണ്ടെന്ന പുതിയ പഠനങ്ങളും പുറത്തുവരുന്നുണ്ട്. ഭക്ഷ്യസുരക്ഷാ മാനദണ്ഡങ്ങൾ പാലിക്കാതെ ഉൽപ്പന്നങ്ങൾ വിദേശ വിപണിയിലെത്തിക്കാൻ കഴിയില്ലെന്ന ശക്തമായ മുന്നറിയിപ്പാണ് ഈ തീരുമാനം നൽകുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t

Related Posts

Leave a Reply

Your email address will not be published. Required fields are marked *

© 2026 Pravasi Varthakal - WordPress Theme by WPEnjoy