
Smoking and infertility WHO; പുകയില ഉപയോഗം സ്ത്രീകളുടെയും പുരുഷന്മാരുടെയും പ്രത്യുൽപാദന ആരോഗ്യത്തെ ഗുരുതരമായി ബാധിക്കുമെന്നും വന്ധ്യതാ സാധ്യത വർധിപ്പിക്കുമെന്നും ലോകാരോഗ്യ സംഘടന (WHO) മുന്നറിയിപ്പ് നൽകി. കുഞ്ഞുങ്ങൾക്ക് ജന്മം നൽകാൻ ആഗ്രഹിക്കുന്ന ദമ്പതികൾ പുകവലി പൂർണ്ണമായും ഉപേക്ഷിക്കണമെന്നും സംഘടന നിർദേശിച്ചു. 2000 മുതൽ 2026 വരെയുള്ള പഠനങ്ങൾ വിലയിരുത്തി തയ്യാറാക്കിയ റിപ്പോർട്ടിലാണ് നിർണ്ണായക വിവരങ്ങളുള്ളത്. പുകവലിക്കാത്തവരെ അപേക്ഷിച്ച് പുകവലിക്കുന്ന സ്ത്രീകൾക്ക് വന്ധ്യതയ്ക്കുള്ള സാധ്യത 40 ശതമാനം കൂടുതലാണെന്ന് റിപ്പോർട്ട് ചൂണ്ടിക്കാട്ടുന്നു. പുരുഷന്മാരിലും പുകവലി വലിയ പ്രത്യാഘാതങ്ങൾ ഉണ്ടാക്കുന്നുണ്ട്. 60,000-ത്തിലധികം പുരുഷന്മാരെ ഉൾപ്പെടുത്തി നടത്തിയ 44 പഠനങ്ങളുടെ അവലോകനത്തിൽ, ബീജത്തിന്റെ ചലനശേഷി കുറയുക, ബീജത്തിന്റെ ആകൃതിയിൽ അസ്വാഭാവികതയുണ്ടാകുക, ഉദ്ധാരണക്കുറവ്, സ്ഖലനവുമായി ബന്ധപ്പെട്ട പ്രശ്നങ്ങൾ എന്നിവ പുകവലിയുമായി ബന്ധപ്പെട്ടിരിക്കുന്നുവെന്ന് കണ്ടെത്തി. പുകവലിക്കുന്നവർക്ക് മാത്രമല്ല, മറ്റുള്ളവർ വലിച്ചുവിടുന്ന പുക ശ്വസിക്കുന്നവർക്കും പ്രത്യുൽപാദന ആരോഗ്യപ്രശ്നങ്ങൾക്ക് സാധ്യതയുണ്ടെന്ന് WHO മുന്നറിയിപ്പ് നൽകുന്നു. പുകവലിക്കാത്ത മറ്റുള്ളവരെ അപേക്ഷിച്ച്, പുകവലിക്കുന്നവരുടെ സാമീപ്യത്തിൽ കഴിയുന്ന സ്ത്രീകൾക്ക് വന്ധ്യതാ സാധ്യത 20 ശതമാനം കൂടുതലാണെന്നും റിപ്പോർട്ട് വ്യക്തമാക്കുന്നു. വന്ധ്യതാ ചികിത്സ തേടുന്ന ദമ്പതികൾക്കും പുകവലി വലിയ തിരിച്ചടിയാകാം. ഐവിഎഫ് (IVF) ഉൾപ്പെടെയുള്ള സഹായപ്രജനന ചികിത്സകളെക്കുറിച്ചുള്ള 21 പഠനങ്ങൾ പരിശോധിച്ചതിൽ, പുകവലി ഗർഭധാരണ നിരക്കും ജീവനോടെ കുഞ്ഞ് ജനിക്കാനുള്ള നിരക്കും കുറയ്ക്കുന്നതായി കണ്ടെത്തി. ചില സാഹചര്യങ്ങളിൽ ചികിത്സ വിജയിക്കാനുള്ള സാധ്യത പകുതിയോളം കുറയാൻ ഇത് കാരണമാകും; എങ്കിലും എല്ലാ പുകവലിക്കാർക്കും ഒരേ രീതിയിലുള്ള ഫലമായിരിക്കില്ല ഉണ്ടാവുകയെന്നും പഠനങ്ങൾ സൂചിപ്പിക്കുന്നു.
പുകവലി നിർത്തുന്നത് പ്രത്യുൽപാദന ആരോഗ്യത്തിന് വലിയ ഗുണം ചെയ്യുമെന്നും റിപ്പോർട്ടിലുണ്ട്. പുകവലി തുടരുന്ന സ്ത്രീകളെ അപേക്ഷിച്ച് പുകവലി ഉപേക്ഷിച്ച സ്ത്രീകളിൽ വന്ധ്യതാ സാധ്യത 25 ശതമാനം കുറവാണെന്നാണ് കണ്ടെത്തൽ. പുകയില ഉപയോഗം സ്ത്രീ-പുരുഷ പ്രത്യുൽപാദന ആരോഗ്യത്തെ പ്രതികൂലമായി ബാധിക്കുന്നതിനാൽ ഗർഭധാരണത്തിന് പദ്ധതിയിടുന്നവർ പുകവലി ഉപേക്ഷിക്കണമെന്ന് WHOയുടെ ടുബാക്കോ ഫ്രീ ഇനിഷ്യേറ്റീവിലെ മെഡിക്കൽ ഓഫീസർ ഡോ. കെർസ്റ്റിൻ ഷോട്ടെ നിർദേശിച്ചു. ഇ-സിഗരറ്റ്, ഷീഷ തുടങ്ങിയ ഉൽപ്പന്നങ്ങളും പ്രത്യുൽപാദന ആരോഗ്യത്തിന് ഭീഷണി സൃഷ്ടിച്ചേക്കാമെന്ന് സംഘടന മുന്നറിയിപ്പ് നൽകുന്നുണ്ടെങ്കിലും, ഇവയുടെ പ്രത്യാഘാതങ്ങളെക്കുറിച്ചുള്ള പഠനങ്ങൾ ഇപ്പോഴും പരിമിതമാണ്. ലോകത്ത് പ്രത്യുൽപാദന പ്രായത്തിലുള്ള ആറുപേരിൽ ഒരാൾക്ക് ജീവിതത്തിലെ ഏതെങ്കിലും ഘട്ടത്തിൽ വന്ധ്യത അനുഭവപ്പെടുന്നുണ്ടെന്നാണ് WHOയുടെ കണക്ക്. പുകയില ഉപയോഗം കുറയ്ക്കുന്നതിനും പുകവലി ഉപേക്ഷിക്കാൻ ആവശ്യമായ ശാസ്ത്രീയ പിന്തുണ നൽകുന്നതിനും ആരോഗ്യപ്രവർത്തകർ ശ്രദ്ധ ചെലുത്തണമെന്നും സംഘടന ആവശ്യപ്പെട്ടു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t