ഈകാര്യങ്ങൾ ശ്രദ്ധിച്ചില്ലെങ്കില്‍ എട്ടിന്‍റെ പണി കിട്ടും; യുഎഇയില്‍ വ്യാജ തൊഴിൽ വാഗ്ദാനങ്ങളും വിസ തട്ടിപ്പുകളും സംബന്ധിച്ച് മുന്നറിയിപ്പ്
തൊഴിൽ കരാറുകളുടെയും റെസിഡൻസി പെർമിറ്റുകളുടെയും ആരംഭ തീയതികൾ ഏകീകരിക്കുന്നതിന് യുഎഇ മാനവ വിഭവശേഷി, എമിറേറ്റൈസേഷൻ മന്ത്രാലയം (MoHRE) നീക്കം തുടങ്ങി. നടപടിക്രമങ്ങൾ ലളിതമാക്കാനും സേവനങ്ങളുടെ കാര്യക്ഷമത വർധിപ്പിക്കാനും ലക്ഷ്യമിടുന്ന “സീറോ ബ്യൂറോക്രസി” പദ്ധതിയുടെ ഭാഗമായാണ് ഈ തീരുമാനം. സ്വകാര്യ മേഖലയിലെ തൊഴിലാളികളുമായി ബന്ധപ്പെട്ട നടപടികൾ വേഗത്തിലാക്കുന്നതിനും ബിസിനസ് സേവനങ്ങൾ കൂടുതൽ ഫലപ്രദമാക്കുന്നതിനുമായി നടന്ന കസ്റ്റമർ കൗൺസിൽ യോഗത്തിൽ മന്ത്രാലയം ഈ നീക്കം ചർച്ച ചെയ്തു. യുഎഇയിലെ സ്ഥാപനങ്ങൾക്കായി എച്ച്.ആർ, ബിസിനസ് മാനേജ്‌മെൻ്റ് പ്രക്രിയകൾ ലളിതമാക്കുന്ന “വർക്ക് പാക്കേജ്” പ്ലാറ്റ്‌ഫോം വഴിയാണ് ഈ സേവനങ്ങൾ ലഭ്യമാക്കുക.
മാനവ വിഭവശേഷി അഫയേഴ്‌സ് അണ്ടർസെക്രട്ടറി ഖലീൽ അൽ ഖൂരി, സപ്പോർട്ട് സർവീസസ് അസിസ്റ്റൻ്റ് അണ്ടർസെക്രട്ടറി മുഹമ്മദ് സാഖർ അൽ നുഐമി എന്നിവർ അടക്കമുള്ള ഉദ്യോഗസ്ഥരും സ്വകാര്യ മേഖലയിലെ പ്രതിനിധികളും യോഗത്തിൽ പങ്കെടുത്തു. MoHREയുടെ കസ്റ്റമർ കൗൺസിൽ പ്രതിമാസമായി ചേരുന്ന യോഗങ്ങളിൽ പ്രധാന സേവനങ്ങൾ മെച്ചപ്പെടുത്താനുള്ള മാർഗങ്ങൾ ചർച്ച ചെയ്യുന്നു.
2025-ന്റെ ആദ്യ പകുതിയിലൊടുവിൽ, നേരിട്ടും ഓൺലൈനായും 23 സെഷനുകൾ മന്ത്രാലയം സംഘടിപ്പിച്ചു — ഇതിൽ 2,400-ലധികം പേർ പങ്കെടുത്തു. 2022-ൽ ആരംഭിച്ച സംരംഭത്തിനുശേഷം, സേവനങ്ങളിലെ വെല്ലുവിളികൾ പരിഹരിക്കാനും നവീന പരിഹാരങ്ങൾ നിർദ്ദേശിക്കാനും 140 സെഷനുകൾ സംഘടിപ്പിച്ചിട്ടുണ്ടെന്നും, ഇതിൽ 23,000-ൽ അധികം പങ്കാളികൾ ഇടപെട്ടിട്ടുണ്ടെന്നും MoHRE അറിയിച്ചു.
അതേസമയം, തൊഴിൽ തട്ടിപ്പുകളെ കുറിച്ച് മന്ത്രാലയം ശക്തമായ മുന്നറിയിപ്പ് നൽകി. പണം വാങ്ങി വ്യാജ തൊഴിൽ ഓഫറുകൾ, കരാറുകൾ, റെസിഡൻസി രേഖകൾ തുടങ്ങിയവ നൽകി ജോലി അന്വേഷിക്കുന്നവരെ വഞ്ചിക്കുന്ന ക്രിമിനൽ സംഘങ്ങൾ സജീവമാണെന്ന് MoHRE വ്യക്തമാക്കി. യഥാർത്ഥ തൊഴിൽ ഓഫറുകൾ മാനവ വിഭവശേഷി, എമിറേറ്റൈസേഷൻ മന്ത്രാലയം വഴിയാണ് നൽകേണ്ടതെന്നും, അവയ്‌ക്കൊപ്പം ഔദ്യോഗിക വർക്ക് എൻട്രി പെർമിറ്റ് ഉണ്ടായിരിക്കണമെന്നും മന്ത്രാലയം ഓർമ്മിപ്പിച്ചു. “ഏതെങ്കിലും ഓഫർ സ്വീകരിക്കുന്നതിന് മുമ്പ് അതിന്റെ ആധികാരികത നിർബന്ധമായും പരിശോധിക്കണം,” എന്ന് MoHRE മുന്നറിയിപ്പ് നൽകി.
യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക* https://chat.whatsapp.com/DfsJVtpVohVHb4aFdLbW46?mode=wwt
സുപ്രധാന ചുവടുവെയ്പ്; യുഎഇക്കും ഈ രാജ്യത്തിനും ഇടയിൽ പുതിയ റെയിൽ സർവീസ് പ്രഖ്യാപിച്ചു
യുഎഇയും ഒമാനും തമ്മിലുള്ള ബന്ധം കൂടുതൽ ശക്തമാക്കുന്ന പുതിയ റെയിൽ സർവീസ് പ്രഖ്യാപിച്ചു. ഇരു രാജ്യങ്ങളെയും ബന്ധിപ്പിക്കുന്ന ആദ്യ അതിർത്തി കടന്നുള്ള റെയിൽവേ ശൃംഖലയുടെ ഓപ്പറേറ്ററായ ഹാഫീറ്റ് റെയിൽ കമ്പനിയുമായി എ.ഡി. പോർട്സ് ഗ്രൂപ്പിന്റെ അനുബന്ധ സ്ഥാപനമായ നോട്ടം ലോജിസ്റ്റിക്സ് പ്രാഥമിക കരാറിൽ ഒപ്പുവെച്ചു. സൊഹാറിനെയും അബുദാബിയെയും ബന്ധിപ്പിക്കുന്ന പുതിയ ചരക്ക് റെയിൽ സർവീസ് സ്ഥാപിക്കാനാണ് കരാറിലൂടെ ലക്ഷ്യമിടുന്നത്. കരാർ പ്രകാരം, ഹാഫീറ്റ് റെയിലിൻ്റെ ശൃംഖല ഉപയോഗിച്ച് നോട്ടം ലോജിസ്റ്റിക്സ് പ്രതിദിന റെയിൽ സർവീസ് നടത്തും. ആഴ്ചയിൽ ഏഴ് കണ്ടെയ്‌നർ ട്രെയിനുകൾ സർവീസ് നടത്താനാണ് പദ്ധതി, ഓരോ ട്രെയിനിനും 276 ടി.ഇ.യു കണ്ടെയ്‌നറുകൾ വഹിക്കാൻ ശേഷിയുണ്ടാകും. ഇതുവഴി പ്രതിവർഷം 1,93,200 ടി.ഇ.യു ചരക്ക് കൈകാര്യം ചെയ്യാനാകും.
ആരംഭം മുതൽ തന്നെ 20, 40, 45 അടി വലിപ്പമുള്ള കണ്ടെയ്‌നറുകൾക്കായി സമർപ്പിത ട്രെയിനുകൾ ലഭ്യമാകും. പൊതു ചരക്കുകൾ, നിർമ്മിത ഉൽപ്പന്നങ്ങൾ, ഭക്ഷ്യവസ്തുക്കൾ, മരുന്നുകൾ, കാർഷികോത്പന്നങ്ങൾ, മറ്റ് അവശ്യ വസ്തുക്കൾ തുടങ്ങിയവയെല്ലാം ഈ റെയിൽ പാതയിലൂടെ കൈകാര്യം ചെയ്യും. അബുദാബിയിൽ നടന്ന ഗ്ലോബൽ റെയിൽ 2025 എക്സിബിഷനിലാണ് കരാർ ഒപ്പുവെച്ചത്. യുഎഇയും ഒമാനും തമ്മിലുള്ള സമർപ്പിത ചരക്ക് റെയിൽ ഇടനാഴി സ്ഥാപിക്കുന്നതിൽ ഇതൊരു പ്രധാന ചുവടുവെപ്പാണ്. “മേഖലയിലെ ഏറ്റവും തന്ത്രപ്രധാനമായ രണ്ട് കേന്ദ്രങ്ങളെ ആദ്യമായി റെയിൽ മാർഗം ബന്ധിപ്പിക്കുന്നതിലൂടെ, ഞങ്ങൾ ഞങ്ങളുടെ സേവനങ്ങളുടെ വ്യാപ്തി വർധിപ്പിക്കുന്നു. ഇത് ചെലവുകുറഞ്ഞതും സുസ്ഥിരവുമായ ഗതാഗത മാർഗ്ഗം ഉറപ്പാക്കും,” എന്ന് നോട്ടം ലോജിസ്റ്റിക്സ് സി.ഇ.ഒ സമീർ ചതുർവേദി പറഞ്ഞു. “ഇത് പ്രവർത്തനപരമായ മാറ്റങ്ങൾക്കപ്പുറം, പ്രാദേശിക വിതരണ ശൃംഖലകളെ ശക്തിപ്പെടുത്തുകയും യുഎഇ–ഒമാൻ സാമ്പത്തിക സംയോജനത്തിന് പുതുഅവസരങ്ങൾ സൃഷ്ടിക്കുകയും ചെയ്യും,” അദ്ദേഹം കൂട്ടിച്ചേർത്തു.
യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക* https://chat.whatsapp.com/DfsJVtpVohVHb4aFdLbW46?mode=wwt
യുഎഇ സോഷ്യൽ മീഡിയ പരസ്യ പെർമിറ്റ്: രജിസ്ട്രേഷൻ കാലാവധി ഈ ദിവസം വരെ നീട്ടി; വിശദമായി അറിയാം
യുഎഇയിൽ സോഷ്യൽ മീഡിയ പ്ലാറ്റ്‌ഫോമുകളിലൂടെ പരസ്യം ചെയ്യുന്ന വ്യക്തികൾക്കുള്ള അഡ്വർടൈസർ പെർമിറ്റ് രജിസ്ട്രേഷന്റെ കാലാവധി നീട്ടി നൽകി. കഴിഞ്ഞ ജൂലൈയിൽ ആരംഭിച്ച ഈ പദ്ധതിയിലേക്ക് ഇപ്പോൾ 2026 ജനുവരി 31 വരെ രജിസ്റ്റർ ചെയ്യാം. സോഷ്യൽ മീഡിയ, വെബ്‌സൈറ്റുകൾ, മൊബൈൽ ആപ്ലിക്കേഷനുകൾ തുടങ്ങിയ ഓൺലൈൻ പ്ലാറ്റ്‌ഫോമുകളിൽ പ്രതിഫലത്തോടെ ആകട്ടെ, ഇല്ലാതെയാകട്ടെ പരസ്യങ്ങൾ പ്രസിദ്ധീകരിക്കാൻ ഈ പെർമിറ്റ് നിർബന്ധമാണ്. ഡിജിറ്റൽ പരസ്യ മേഖലയിൽ സുതാര്യതയും ഉപയോക്തൃ സംരക്ഷണവും ഉറപ്പാക്കുന്നതിനായി യുഎഇ മീഡിയ കൗൺസിൽ ഈ നിയമം നടപ്പിലാക്കിയതായി റിപ്പോർട്ടുകൾ വ്യക്തമാക്കുന്നു.
പദ്ധതി, ഉന്നത നിലവാരത്തിലുള്ള ഉള്ളടക്കം നിർമ്മിക്കാൻ കഴിവുള്ളവരെയും നിക്ഷേപകരെയും ഈ മേഖലയിലേക്ക് ആകർഷിക്കുകയാണ് ലക്ഷ്യമിടുന്നത്. 18 വയസ്സ് പൂർത്തിയായ യുഎഇ പൗരന്മാർക്കും താമസക്കാർക്കും പെർമിറ്റിന്റെ കാലാവധി ഒരു വർഷമാണ്, ഇത് വർഷം തോറും പുതുക്കാം. അപേക്ഷകർക്ക് ബന്ധപ്പെട്ട അധികാരികളിൽ നിന്നുള്ള ഇലക്ട്രോണിക് മീഡിയ ട്രേഡ് ലൈസൻസ് ഉണ്ടായിരിക്കണം. യുഎഇ സന്ദർശകർക്ക് ലൈസൻസുള്ള പരസ്യ ഏജൻസികളോ ടാലന്റ് മാനേജ്മെൻറ് ഏജൻസികളോ വഴി പരസ്യ പെർമിറ്റ് നേടാം. ഇവയ്ക്ക് മൂന്ന് മാസം സാധുതയുണ്ടാകും, ആവശ്യമെങ്കിൽ പുതുക്കാം. പെർമിറ്റ് ലഭിച്ചവർ ഉയർന്ന ഉള്ളടക്ക നിലവാരം പാലിക്കുകയും പരസ്യ അക്കൗണ്ടുകളിൽ പെർമിറ്റ് നമ്പർ വ്യക്തമായി പ്രദർശിപ്പിക്കുകയും വേണം. വ്യാജ കമ്പനികളിലൂടെയോ അക്കൗണ്ടുകളിലൂടെയോ പരസ്യം നൽകുന്നത് കർശനമായി നിരോധിച്ചിട്ടുണ്ട്. എന്നാൽ, സ്വന്തം ഉൽപ്പന്നങ്ങളോ സേവനങ്ങളോ മാത്രം പരസ്യം ചെയ്യുന്നവർക്ക് ഈ നിയമം ബാധകമല്ല. അതുപോലെ വിദ്യാഭ്യാസമോ സാംസ്കാരികപ്രവർത്തനങ്ങളോ നടത്തുന്ന പ്രായപൂർത്തിയാകാത്തവർക്കും പെർമിറ്റ് ആവശ്യമില്ല.
പുതിയ നിയമങ്ങൾ പാലിക്കാനുള്ള കമ്പനികൾക്കും വ്യക്തികൾക്കും കൂടുതൽ സമയം നൽകുന്നതിനാണ് യുഎഇ മീഡിയ കൗൺസിൽ പെർമിറ്റ് രജിസ്ട്രേഷൻ സമയം നീട്ടിയതെന്ന് അധികൃതർ അറിയിച്ചു.
യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക* https://chat.whatsapp.com/DfsJVtpVohVHb4aFdLbW46?mode=wwt
Comments (0)