ദുബൈയിൽ പുതിയ പള്ളികൾ നിർമിക്കുന്നതിനുള്ള അനുമതി നടപടികൾ ഇനി കൂടുതൽ വേഗത്തിൽ പൂർത്തിയാക്കും. പള്ളി നിർമാണത്തിനുള്ള അനുമതി പരമാവധി അഞ്ച് ദിവസത്തിനുള്ളിൽ ലഭ്യമാക്കുന്ന പുതിയ സംയുക്ത പദ്ധതിക്ക് ദുബൈ മുനിസിപ്പാലിറ്റിയും ഇസ്‌ലാമിക് അഫയേഴ്‌സ് ആൻഡ് ചാരിറ്റബിള്‍ ആക്ടിവിറ്റീസ് ഡിപ്പാർട്ട്‌മെന്റും (ഐ.എ.സി.എ.ഡി) തുടക്കമിട്ടു. നിർമാണാനുമതിയുമായി ബന്ധപ്പെട്ട നടപടികൾ ലളിതമാക്കുന്നതിനൊപ്പം പള്ളികളുടെ രൂപകൽപ്പനയും അനുബന്ധ സൗകര്യങ്ങളും സംബന്ധിച്ച ആവശ്യകതകൾ കൂടി പരിഗണിച്ചാണ് പുതിയ സംവിധാനം ഒരുക്കുന്നത്. പുതിയ പള്ളികളുടെ നിർമാണം മാത്രമല്ല, നിലവിലുള്ള പള്ളികളുടെ വിപുലീകരണം, രൂപമാറ്റം, അറ്റകുറ്റപ്പണികൾ എന്നിവയ്ക്കുള്ള നടപടികളും ഇതിലൂടെ ഏകോപിപ്പിക്കും. ദുബൈയിലെ ജനസംഖ്യാ വർധനയ്ക്കും പുതിയ താമസമേഖലകളുടെ വികസനത്തിനും അനുസരിച്ച് ആരാധനാലയങ്ങൾ സമയബന്ധിതമായി ഒരുക്കുകയാണ് പദ്ധതിയുടെ പ്രധാന ലക്ഷ്യം. ഇതിനായി അപേക്ഷകളുടെ നടപടിക്രമങ്ങൾ കുറയ്ക്കുകയും നിർമാണവുമായി ബന്ധപ്പെട്ട സാങ്കേതിക പരിശോധനകൾ നേരത്തേ പൂർത്തിയാക്കുകയും ചെയ്യും.

പള്ളികളുടെ പ്രാഥമിക രൂപരേഖകൾ ദുബൈ മുനിസിപ്പാലിറ്റിയും ഐ.എ.സി.എ.ഡിയും സംയുക്തമായി പരിശോധിക്കും. നിർമാണത്തിന് ആവശ്യമായ സാങ്കേതികവും നിയമപരവുമായ നിബന്ധനകൾ അപേക്ഷ സമർപ്പിക്കുന്നതിന് മുമ്പുതന്നെ വിലയിരുത്തും. ഇതോടെ അപേക്ഷകളിൽ പിന്നീട് തിരുത്തലുകൾ വരുത്തേണ്ട സാഹചര്യം കുറയുകയും അനുമതി ലഭിക്കാനുള്ള കാലതാമസം ഒഴിവാക്കുകയും ചെയ്യാം.
പുതിയ സംവിധാനം പള്ളികളുടെ നിർമാണവും വികസനവും കൂടുതൽ കാര്യക്ഷമമാക്കുന്നതിനൊപ്പം ദുബൈയിലെ വിവിധ താമസമേഖലകളിൽ ആരാധനാ സൗകര്യങ്ങൾ വേഗത്തിൽ ലഭ്യമാക്കാനും സഹായിക്കുമെന്ന് അധികൃതർ വ്യക്തമാക്കി.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t