യുഎഇയിൽ വരും ദിവസങ്ങളിൽ കാലാവസ്ഥയിൽ വലിയ മാറ്റങ്ങൾക്ക് സാധ്യതയെന്ന് ദേശീയ കാലാവസ്ഥാ കേന്ദ്രത്തിന്റെ (NCM) മുന്നറിയിപ്പ്. രാജ്യത്തിന്റെ വിവിധ ഭാഗങ്ങളിൽ മഴ ലഭിക്കാനും താപനില താഴാനും സാധ്യതയുണ്ട്. ചില പ്രദേശങ്ങളിൽ ശക്തമായ മഴയ്ക്കൊപ്പം മണിക്കൂറിൽ 50 കിലോമീറ്റർ വരെ വേഗതയിൽ കാറ്റ് വീശാനും ഇടയുണ്ടെന്നാണ് അടുത്ത അഞ്ച് ദിവസത്തേക്കുള്ള കാലാവസ്ഥാ പ്രവചനത്തിൽ വ്യക്തമാക്കുന്നത്.
ഞായർ, തിങ്കൾ (നവംബർ 8, 9): ഞായറാഴ്ച തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കും. കാറ്റിന്റെ വേഗം മണിക്കൂറിൽ 35 കിലോമീറ്റർ വരെയാകാം. തിങ്കളാഴ്ചയോടെ തീരപ്രദേശങ്ങളിലും ദ്വീപുകളിലും മേഘാവരണം വർധിക്കും. ചൊവ്വാഴ്ച പുലർച്ചയോടെ ചിലയിടങ്ങളിൽ നേരിയ മഴയ്ക്കും സാധ്യതയുണ്ട്.
ചൊവ്വ (നവംബർ 10): ദ്വീപുകൾ, തീരദേശങ്ങൾ, വടക്കൻ മേഖലകൾ എന്നിവിടങ്ങളിൽ ചെറിയ തോതിൽ മഴ ലഭിച്ചേക്കും. താപനില കുറയുന്നതിനൊപ്പം കാറ്റിന്റെ വേഗം മണിക്കൂറിൽ 40 കിലോമീറ്റർ വരെയെത്താം. അറേബ്യൻ ഉൾക്കടലിൽ കടൽ പ്രക്ഷുബ്ധമാകാനും സാധ്യതയുണ്ട്.
ബുധൻ (നവംബർ 11): കാലാവസ്ഥയിൽ കൂടുതൽ മാറ്റങ്ങളുണ്ടാകുന്ന ദിവസമായിരിക്കും. രാജ്യത്തിന്റെ വിവിധ ഭാഗങ്ങളിൽ കാർമേഘങ്ങൾ രൂപപ്പെടുകയും ഇടവിട്ട് മഴ ലഭിക്കുകയും ചെയ്യും. ചില പ്രദേശങ്ങളിൽ ശക്തമായ മഴയ്ക്കും സാധ്യതയുണ്ട്. മണിക്കൂറിൽ 45 കിലോമീറ്റർ വരെ വേഗത്തിൽ കാറ്റ് വീശുന്നത് പൊടിപടലങ്ങൾ ഉയരുന്നതിനും റോഡുകളിലെ കാഴ്ചപരിധി കുറയുന്നതിനും കാരണമായേക്കാം. കടലിലും പ്രക്ഷുബ്ധാവസ്ഥ തുടരും.
വ്യാഴം (നവംബർ 12): ഭാഗികമായി മേഘാവൃതമായ കാലാവസ്ഥ തുടരും. ചിലയിടങ്ങളിൽ വീണ്ടും മഴ ലഭിക്കാനും താപനില താഴാനും സാധ്യതയുണ്ട്. കടലിൽ മണിക്കൂറിൽ 50 കിലോമീറ്റർ വരെ വേഗത്തിൽ കാറ്റ് വീശിയേക്കും.
അന്തരീക്ഷത്തിന്റെ താഴ്ന്നതലത്തിലുള്ള ദുർബലമായ ന്യൂനമർദ്ദ സംവിധാനവും ഉയർന്ന തലത്തിലുള്ള മർദ്ദ സംവിധാനവും ചേർന്നാണ് കാലാവസ്ഥാ മാറ്റങ്ങൾക്ക് കാരണമാകുന്നതെന്ന് എൻസിഎം വിശദീകരിച്ചു. കടൽയാത്രയ്ക്ക് ഒരുങ്ങുന്നവരും മത്സ്യത്തൊഴിലാളികളും കാലാവസ്ഥാ മുന്നറിയിപ്പുകൾ ശ്രദ്ധിക്കണമെന്നും അധികൃതർ നിർദേശിച്ചു.
