UAE Medical Evacuations; സംഘർഷ ബാധിത പ്രദേശങ്ങളിൽ നിന്ന് രോഗികളെ സുരക്ഷിതമായി യുഎഇയിലെത്തിക്കുന്ന മെഡിക്കൽ എവാക്വേഷൻ പ്രവർത്തനങ്ങളിൽ വൻ വർധനയെന്ന് റിപ്പോർട്ട്. യുഎഇ ആസ്ഥാനമായി പ്രവർത്തിക്കുന്ന പ്രോമെത്യൂസ് മെഡിക്കൽ ഇന്റർനാഷണലിന്റെ ചീഫ് എക്സിക്യൂട്ടീവ് സ്റ്റീവൻ വൈൻസ് ഖലീജ് ടൈംസിന് നൽകിയ അഭിമുഖത്തിലാണ് ഇക്കാര്യം വ്യക്തമാക്കിയത്. കഴിഞ്ഞ മൂന്ന് നാല് മാസത്തിനുള്ളിൽ മാത്രം ഏകദേശം 1,000 മണിക്കൂറോളം വിമാനയാത്രകൾ ഇത്തരം ദൗത്യങ്ങൾക്കായി നടത്തിയെന്നും, ഇത് കഴിഞ്ഞ വർഷത്തെ അപേക്ഷിച്ച് മൂന്നിരട്ടി കൂടുതലാണെന്നും അദ്ദേഹം പറഞ്ഞു. വിമാനങ്ങൾക്കോ ഹെലികോപ്റ്ററുകൾക്കോ നേരിട്ട് എത്താൻ കഴിയാത്ത സംഘർഷ മേഖലകളിൽ നിന്നാണ് രോഗികളെ എത്തിക്കുന്നത് എന്നതാണ് ഈ ദൗത്യങ്ങളുടെ പ്രധാന വെല്ലുവിളി. ഇത്തരം സാഹചര്യങ്ങളിൽ കവചിത വാഹനങ്ങൾ ഉപയോഗിച്ച് കരമാർഗ്ഗം സുരക്ഷിത അതിർത്തികളിലേക്ക് രോഗികളെ മാറ്റുകയും, അവിടെനിന്ന് എയർ ആംബുലൻസിലേക്ക് മാറ്റുകയുമാണ് ചെയ്യുന്നത്. വിസ നടപടികൾ ക്രമീകരിക്കുന്നതും, മൊബൈൽ ഇന്റൻസീവ് കെയർ യൂണിറ്റുകളുള്ള വിമാനങ്ങളിൽ വിദഗ്ധ ഡോക്ടർമാരുടെയും പാരാമെഡിക്കൽ ജീവനക്കാരുടെയും സേവനം ഉറപ്പാക്കുന്നതും ഒരൊറ്റ സംഘടനയ്ക്ക് കീഴിൽ വളരെ ആസൂത്രിതമായാണ് നടപ്പിലാക്കുന്നതെന്ന് വൈൻസ് വ്യക്തമാക്കി. പ്രാദേശികമായ സുരക്ഷാ സാഹചര്യങ്ങളും അതിർത്തി നിയന്ത്രണങ്ങളും മനസ്സിലാക്കി പ്രവർത്തിക്കാൻ മുൻകൂട്ടി തയ്യാറാക്കിയ ശൃംഖലകൾ അനിവാര്യമാണ്. പ്രതിസന്ധികൾക്ക് ശേഷം സഹായം തേടുന്നതിനേക്കാൾ മുൻകൂട്ടി ഇത്തരം പ്രവർത്തനങ്ങൾ ആസൂത്രണം ചെയ്യുകയാണ് വേണ്ടതെന്നും അദ്ദേഹം ചൂണ്ടിക്കാട്ടി. പ്രധാനപ്പെട്ട എണ്ണ, ഗ്യാസ് കമ്പനികളുമായി ചേർന്ന് വിവിധ അടിയന്തര സാഹചര്യങ്ങൾ മുൻകൂട്ടി കണ്ട് മോക് ഡ്രില്ലുകളും സിമുലേഷനുകളും സംഘടിപ്പിക്കാറുണ്ട്. അപകടം നടന്ന ഉടൻ സ്ഥലത്തുള്ളവർക്ക് നൽകാൻ കഴിയുന്ന പ്രഥമ ശുശ്രൂഷകൾക്ക് വലിയ പ്രാധാന്യമുണ്ട്. വിദഗ്ധ സഹായം എത്തുന്നതുവരെ ഗുരുതരമായ മുറിവുകൾ കൈകാര്യം ചെയ്യാനും രോഗിയെ സ്ഥിരപ്പെടുത്താനും സഹപ്രവർത്തകർക്ക് പരിശീലനം നൽകേണ്ടത് അത്യാവശ്യമാണ്. ഉദാഹരണത്തിന്, ഓഫീസുകളിൽ ഓട്ടോമേറ്റഡ് എക്സ്റ്റേണൽ ഡിഫിബ്രിലേറ്ററുകൾ സ്ഥാപിച്ചതുകൊണ്ട് മാത്രം കാര്യമില്ല, അത് എങ്ങനെ ഉപയോഗിക്കണമെന്ന് ജീവനക്കാർ അറിഞ്ഞിരിക്കണം. വിദഗ്ധ ചികിത്സ ലഭ്യമാക്കാൻ സമയമെടുക്കുന്ന വിദൂര സ്ഥലങ്ങളിൽ ജോലി ചെയ്യുന്നവർക്ക് സൈനിക വൈദ്യശാസ്ത്രത്തിൽ ഉപയോഗിക്കുന്ന തരം ‘പ്രൊലോങ്ഡ് ഫീൽഡ് കെയർ’ പരിശീലനം നൽകുന്നത് ജീവൻ രക്ഷിക്കാൻ സഹായിക്കുമെന്നും സ്റ്റീവൻ വൈൻസ് കൂട്ടിച്ചേർത്തു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_