Strait of Hormuz oil tanker fire; പശ്ചിമേഷ്യയിൽ അമേരിക്ക, ഇസ്രായേൽ, ഇറാൻ രാജ്യങ്ങൾ തമ്മിലുള്ള സംഘർഷസാധ്യത വീണ്ടും രൂക്ഷമായതോടെ മേഖലയിൽ യുദ്ധഭീതി ശക്തമാകുന്നു. ഇതിനിടെ, തന്ത്രപ്രധാനമായ ഹോർമുസ് കടലിടുക്കിൽ മൂന്ന് എണ്ണക്കപ്പലുകൾക്ക് തീപിടിച്ചതായി ഇറാന്റെ അവകാശവാദം പുറത്തുവന്നത് ആഗോളതലത്തിൽ ആശങ്ക വർധിപ്പിച്ചു. വ്യോമ-സമുദ്ര സുരക്ഷയെ ബാധിച്ചേക്കാവുന്ന ഈ സാഹചര്യത്തിൽ യുഎഇ ഉൾപ്പെടെയുള്ള ഗൾഫ് രാജ്യങ്ങളിലെ പ്രവാസികൾക്കിടയിലും കടുത്ത ആശങ്കയാണ് നിലനിൽക്കുന്നത്.
ഹോർമുസ് കടലിടുക്ക് വഴി കടന്നുപോകാൻ ശ്രമിച്ച മൂന്ന് എണ്ണ ടാങ്കറുകൾ മൈനുകളിൽ തട്ടി തീപിടിച്ചതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) അവകാശപ്പെട്ടു. മുന്നറിയിപ്പുകൾ അവഗണിച്ച്, റഡാറും നാവിഗേഷൻ സംവിധാനങ്ങളും ഓഫ് ചെയ്ത് അനധികൃത പാതയിലൂടെ സഞ്ചരിച്ചതിനാലാണ് അപകടമെന്നാണ് ഇറാന്റെ ആരോപണം. എന്നാൽ, ഏത് രാജ്യങ്ങളുടെ കപ്പലുകളാണെന്നോ അപകടം നടന്ന കൃത്യമായ സമയമോ സംബന്ധിച്ച വിവരങ്ങൾ വ്യക്തമല്ല. ഇതിന് അന്താരാഷ്ട്ര തലത്തിൽ സ്വതന്ത്ര സ്ഥിരീകരണവും ഉണ്ടായിട്ടില്ല. ലോകത്തെ പ്രധാന ഇന്ധന ഗതാഗത പാതയിലെ ഈ സംഭവം രാജ്യാന്തര എണ്ണ വിപണിയെയും ബാധിച്ചേക്കാം.
ഇറാനെതിരെ ഒരാഴ്ച നീളുന്ന സൈനിക നടപടിക്ക് അമേരിക്കയും ഇസ്രായേലും പദ്ധതിയിടുന്നതായി ചില റിപ്പോർട്ടുകൾ സൂചിപ്പിക്കുന്നു. ആണവ കേന്ദ്രങ്ങൾ, ഊർജ സ്ഥാപനങ്ങൾ, സൈനിക നേതൃത്വം എന്നിവ ആക്രമിക്കപ്പെട്ടേക്കാമെന്നാണ് അഭ്യൂഹം. എന്നാൽ, സൈനിക നടപടി സംബന്ധിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ് അന്തിമ തീരുമാനമൊന്നും കൈക്കൊണ്ടിട്ടില്ല. തിരിച്ചടി ഉണ്ടാകാൻ സാധ്യതയുള്ളതിനാൽ മേഖലയിലെ രാജ്യങ്ങൾക്ക് യുഎസ് മുന്നറിയിപ്പ് നൽകിയിട്ടുണ്ടെന്നാണ് സൂചന. അതേസമയം, വൈസ് പ്രസിഡന്റ് ജെ.ഡി. വാൻസ് വഴി ഇറാനുമായി സമാധാന ചർച്ചകൾ പുനരാരംഭിക്കാൻ നിർദേശം നൽകിയെന്ന വാർത്തകൾ ട്രംപ് നിഷേധിച്ചു. മെഡിക്കൽ സഹായങ്ങളുമായി ബന്ധപ്പെട്ട കാര്യങ്ങൾ മാത്രമാണ് ചർച്ച ചെയ്തതെന്നും അദ്ദേഹം വ്യക്തമാക്കി. സാഹചര്യം കൂടുതൽ വഷളാകാതിരിക്കാൻ ഗൾഫ് രാജ്യങ്ങൾ സജീവമായി രംഗത്തുണ്ട്. സംയമനം പാലിക്കണമെന്നും പ്രശ്നങ്ങൾക്ക് രാഷ്ട്രീയ പരിഹാരം കാണണമെന്നും യുഎഇ ആവശ്യപ്പെട്ടു. ചർച്ചകൾക്ക് കൂടുതൽ സമയം അനുവദിക്കണമെന്ന് സൗദി അറേബ്യയും യുഎസ്–ഇറാൻ ചർച്ചകൾക്കായി ഖത്തറും ശ്രമങ്ങൾ നടത്തുന്നുണ്ട്.
സംഘർഷാവസ്ഥ നിലനിൽക്കെ, യെമനിലെ ഹൂത്തി വിമതർ സൗദി അറേബ്യയുടെ കിഴക്കൻ പ്രവിശ്യ ലക്ഷ്യമിട്ട് വിക്ഷേപിച്ച ബാലിസ്റ്റിക് മിസൈൽ സഖ്യസേന ആകാശത്തുവെച്ചുതന്നെ തകർത്തു. സഖ്യസേനാ വക്താവ് തുർക്കി അൽ മാൽക്കിയാണ് ഇക്കാര്യം വ്യക്തമാക്കിയത്. തെക്കൻ യെമനിലെ ഏദൻ വിമാനത്താവളത്തിന് നേരെയും മിസൈൽ ആക്രമണ ശ്രമമുണ്ടായതായി റിപ്പോർട്ടുകളുണ്ട്.
പ്രവാസികൾക്ക് ജാഗ്രതാനിർദേശം
മേഖലയിലെ അനിശ്ചിതത്വം കണക്കിലെടുത്ത് വിമാന സർവീസുകളുടെ സമയക്രമത്തിലോ യാത്രാപാതകളിലോ മാറ്റമുണ്ടായേക്കാം. അതിനാൽ പ്രവാസികൾ ഇനിപ്പറയുന്ന കാര്യങ്ങൾ പ്രത്യേകം ശ്രദ്ധിക്കണം.
- ഫ്ലൈറ്റ് സ്റ്റാറ്റസ് പരിശോധിക്കുക: വിമാനത്താവളത്തിലേക്ക് തിരിക്കുന്നതിന് മുൻപായി എയർലൈനിന്റെ ഔദ്യോഗിക ആപ്പ് വഴിയോ വെബ്‌സൈറ്റ് വഴിയോ വിമാന സർവീസ് റദ്ദാക്കിയിട്ടില്ലെന്ന് ഉറപ്പുവരുത്തുക.
- കോഡ്‌ഷെയർ ഫ്ലൈറ്റുകൾ: ടിക്കറ്റ് ബുക്ക് ചെയ്തതും യഥാർഥത്തിൽ സർവീസ് നടത്തുന്നതുമായ എയർലൈനുകൾ വ്യത്യസ്തമാണെങ്കിൽ (Codeshare), രണ്ട് കമ്പനികളുടെയും സൈറ്റിൽ വിവരങ്ങൾ പരിശോധിക്കുക.
- റീഫണ്ട് & റീബുക്കിങ്: ഫ്ലൈറ്റ് വൈകുകയോ റദ്ദാക്കുകയോ ചെയ്താൽ തുക തിരികെ ലഭിക്കുന്നതിനും (Refund) മറ്റൊരു തീയതിയിലേക്ക് മാറ്റുന്നതിനുമുള്ള വ്യവസ്ഥകൾ മുൻകൂട്ടി മനസ്സിലാക്കുക.
- ഔദ്യോഗിക അറിയിപ്പുകൾ: സമൂഹമാധ്യമങ്ങളിലെ വ്യാജവാർത്തകളിൽ വിശ്വസിക്കാതെ, യുഎഇ സിവിൽ ഏവിയേഷൻ അധികൃതരുടെയും വിമാനക്കമ്പനികളുടെയും ഔദ്യോഗിക അറിയിപ്പുകൾ മാത്രം ആശ്രയിക്കുക.
