Pravasi Varthakal

ഷാർജ: ശാന്തമായ ഒരു സായാഹ്നം ഹൃദയഭേദകമായ നിലവിളികളിലേക്ക് വഴിമാറിയ നിമിഷങ്ങൾ. ഷാർജയിലെ മാംസാർ ബീച്ചിൽ കടലിൽ മുങ്ങിപ്പോയ രണ്ട് പിഞ്ചുബാലികമാർക്ക് വഴിപോക്കനായി എത്തിയ ഖാസിം മുഹമ്മദ് അൽ സയീദ് എന്ന 25 വയസ്സുകാരനായ ഈജിപ്ഷ്യൻ യുവാവിന്റെ ധീരമായ ഇടപെടലിൽ പുതുജീവൻ ലഭിച്ചു. ഇരുട്ടിൽ ജീവനുവേണ്ടി കൈകാലിട്ടടിച്ച കുരുന്നുകളുടെ രക്ഷകനായ ഖാസിമിനെ ഷാർജ സിവിൽ ഡിഫൻസ് അതോറിറ്റി ആദരിച്ചു.

സംഭവം ഇങ്ങനെ:

കഴിഞ്ഞ വെള്ളിയാഴ്ച രാത്രി 8.30-നാണ് സംഭവം. മഗ് രിബ് നമസ്‌കാരത്തിന് ശേഷം കടൽത്തീരത്ത് ചായകുടിക്കാൻ എത്തിയതായിരുന്നു അയൽക്കാരായ രണ്ട് കുടുംബങ്ങൾ. കളിക്കുന്നതിനിടെയാണ് കുട്ടികൾ അപകടത്തിൽപ്പെട്ടത്. 9 വയസ്സുകാരിയായ യഖീൻ അബ്ദുൽ അലി നസറുദ്ദീൻ, 4 വയസ്സുകാരിയായ ഉമ്മു കുൽസൂമിനെ രക്ഷിക്കാൻ ശ്രമിക്കുന്നതിനിടെ ഇരുവരും ശക്തമായ തിരമാലയിൽ അകപ്പെടുകയായിരുന്നു.

കുട്ടികൾ വെള്ളത്തിൽ മുങ്ങുന്നത് കണ്ട അമ്മമാർ ഉടൻ കടലിലേക്ക് ഓടിയിറങ്ങിയെങ്കിലും നീന്തൽ അറിയാത്തതിനാൽ കൂടുതൽ മുന്നോട്ട് പോകാനായില്ല. ഗർഭിണിയായിരുന്ന ഉമ്മു കുൽസൂമിന്റെ അമ്മ ആഴത്തിലേക്ക് പോയെങ്കിലും യഖീനെ മാത്രമാണ് കണ്ടെത്താൻ കഴിഞ്ഞത്. ഉമ്മു കുൽസൂമിനെ കാണാതാവുകയും ചെയ്തു. ഈ നിസ്സഹായരായ അമ്മമാരുടെ നിലവിളിയാണ് ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന ഖാസിം മുഹമ്മദ് അൽ സയീദിന്റെ ശ്രദ്ധയിൽപ്പെട്ടത്.

ഇരുട്ടിൽ കേട്ട നിലവിളി; യുവാവ് ഓടിയെത്തി

മറ്റൊന്നും ആലോചിക്കാതെ താൻ വെള്ളത്തിലേക്ക് ഓടിയിറങ്ങിയെന്ന് ഖാസിം പറയുന്നു. “ആദ്യം യഖീനെയാണ് കണ്ടെത്തിയത്. അവൾ എന്നെ കെട്ടിപ്പിടിച്ച് തൂങ്ങിക്കിടക്കുകയായിരുന്നു. ആ നിമിഷം അഗാധമായ വെള്ളത്തിനടിയിലായിരുന്ന ചെറിയ കുട്ടിയെ എനിക്ക് കാണാൻ കഴിഞ്ഞില്ല. അതിനാൽ ആദ്യം യഖീനെ കരയിലെത്തിച്ച് ഞാൻ വീണ്ടും രണ്ടാമത്തെ കുഞ്ഞിനുവേണ്ടി തിരികെ പോയി.”

തിരികെ പോയ ഖാസിം, അബോധാവസ്ഥയിലായിരുന്ന ഉമ്മു കുൽസൂം അബുബക്കറിനെ കണ്ടെത്തുകയായിരുന്നു. ഈ സമയം തന്നെ വഴിയാത്രക്കാർ അധികൃതരെ വിവരമറിയിച്ചിരുന്നു.

പുതുജീവൻ നൽകി വീടണഞ്ഞ് കുഞ്ഞുങ്ങൾ

യഖീന് അമ്മ നൽകിയ ഫസ്റ്റ് എയ്ഡ്, സിപിആർ എന്നിവയിലൂടെ ഉടൻതന്നെ ആരോഗ്യം വീണ്ടെടുത്തു. തീവ്രപരിചരണ വിഭാഗത്തിൽ ഒരു ദിവസം ചെലവഴിച്ച ഉമ്മു കുൽസൂമും സുഖം പ്രാപിച്ചു. രണ്ട് പെൺകുട്ടികളെയും ഇന്നലെയാണ് ആശുപത്രിയിൽ നിന്ന് ഡിസ്ചാർജ് ചെയ്തത്.

മകളെ രക്ഷിച്ച ഈ മനുഷ്യനോട് എന്നും കടപ്പെട്ടിരിക്കുമെന്നും അദ്ദേഹം ഒരു യഥാർഥ ഹീറോയാണെന്നും മൗറിറ്റാനിയൻ പ്രവാസിയായ അബുബക്കർ പറഞ്ഞു. “മറ്റൊരാൾ വിഷമിച്ചിരിക്കുന്നത് കണ്ടാലും സഹായിക്കാൻ ഇറങ്ങാത്തവരാണ് പലരും. എന്നാൽ ഖാസിം അങ്ങനെയായിരുന്നില്ല,” യഖീന്റെ പിതാവ് അബ്ദുൽ അലിയും കൂട്ടിച്ചേർത്തു.

രക്ഷകനെ ആദരിച്ച് സിവിൽ ഡിഫൻസ്

സംഭവത്തിന് ദിവസങ്ങൾക്കുശേഷം കുട്ടികൾ സുഖം പ്രാപിച്ച് വീട്ടിലെത്തിയതായി സിവിൽ ഡിഫൻസ് ഖാസിമിനെ അറിയിക്കുകയും അദ്ദേഹത്തെ സർട്ടിഫിക്കറ്റ് നൽകി ആദരിക്കുകയും ചെയ്തു. അദ്ദേഹത്തിന്റെ ധീരതയും അടിയന്തര പ്രതികരണവും ഉന്നതമായ സഹകരണത്തെയും സാമൂഹിക ഉത്തരവാദിത്തബോധത്തെയുമാണ് സൂചിപ്പിക്കുന്നതെന്ന് ഷാർജ സിവിൽ ഡിഫൻസ് അതോറിറ്റിയിലെ കേണൽ യൂസഫ് അൽ ഷംസി പറഞ്ഞു.

അപകട സാധ്യതകൾ മുൻനിർത്തി, സമുദ്ര പ്രദേശങ്ങളിലെ സുരക്ഷാ നടപടികൾ പാലിക്കേണ്ടതിന്റെ പ്രാധാന്യവും അദ്ദേഹം ഊന്നിപ്പറഞ്ഞു. മുമ്പും മാംസാർ ബീച്ചിൽ മുങ്ങിമരണങ്ങൾ സംഭവിച്ചിട്ടുള്ള പശ്ചാത്തലത്തിൽ, അധികൃതർ ബീച്ച് പട്രോളിങ് ശക്തമാക്കാനും കുട്ടികൾക്ക് ലൈഫ് ഗാർഡിങ്ങിലും രക്ഷാ ഉപകരണങ്ങളിലും പരിശീലനം നൽകുന്ന പുതിയ വേനൽക്കാല പരിശീലന പരിപാടികൾ അവതരിപ്പിക്കാനും ഒരുങ്ങുകയാണ്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

അടിച്ചു മോനെ! 20 വർഷത്തെ കാത്തിരിപ്പ് വെറുതെയായില്ല! യുഎഇയിൽ ഇന്ത്യക്കാരനെ തേടി എട്ടര കോടിയോളം രൂപ; മലയാളിക്ക് ‘സൂപ്പർ’ സമ്മാനം

ദുബായ് ∙ പ്രവാസി ഇന്ത്യക്കാർക്ക് വൻ സന്തോഷം സമ്മാനിച്ച് ദുബായ് ഡ്യൂട്ടി ഫ്രീ മില്ലേനിയം മില്യണയർ നറുക്കെടുപ്പ്. ബുധനാഴ്ച ദുബായ് രാജ്യാന്തര വിമാനത്താവളത്തിൽ നടന്ന നറുക്കെടുപ്പിൽ രണ്ട് ഇന്ത്യക്കാർക്ക് 10 ലക്ഷം ഡോളർ (ഏകദേശം 8.3 കോടിയിലധികം രൂപ) വീതം സമ്മാനമായി ലഭിച്ചു. കൂടാതെ, ഒരു ഇന്ത്യക്കാരന് ആഡംബര കാറും ഒരു മലയാളിക്ക് ആഡംബര ബൈക്കും സ്വന്തമായി.

മില്ലേനിയം മില്യണയർ വിജയികൾ

20 വർഷത്തെ കാത്തിരിപ്പിന് വിരാമം മുംബൈ സ്വദേശി അക്ഷയ്പത് സിൻഹാനിയ (56) ആണ് കോടീശ്വരപ്പട്ടം നേടിയവരിൽ ഒരാൾ. റിയൽ എസ്റ്റേറ്റ്, ഓഹരി വിപണി മേഖലകളിൽ പ്രവർത്തിക്കുന്ന അദ്ദേഹം, മില്ലേനിയം മില്യണയർ സീരീസ് 520-ലെ 2837 എന്ന ടിക്കറ്റിലൂടെയാണ് വൻ സമ്മാനം സ്വന്തമാക്കിയത്. കഴിഞ്ഞ 20 വർഷമായി സ്ഥിരമായി ടിക്കറ്റ് എടുക്കുന്ന അക്ഷയ്പത്, ഒടുവിൽ ഭാഗ്യദേവത കനിഞ്ഞതിന്റെ സന്തോഷത്തിലാണ്.

കുവൈത്തിലെ പ്രവാസിക്ക് അപ്രതീക്ഷിത ഭാഗ്യം കുവൈത്തിൽ ജോലി ചെയ്യുന്ന ശ്രീനിവാസ് തേജ റെഡ്ഡി ഗദ്ദാം (35) ആണ് ഒരു മില്യൺ ഡോളർ നേടിയ മറ്റൊരു ഭാഗ്യശാലി. മില്ലേനിയം മില്യണയർ സീരീസ് 521-ലെ 2700 എന്ന ടിക്കറ്റാണ് അദ്ദേഹത്തെ വിജയത്തിലേക്ക് നയിച്ചത്. ഒരു വർഷത്തിലധികമായി കുവൈത്തിലുള്ള ശ്രീനിവാസ് 2024 മുതലാണ് നറുക്കെടുപ്പിൽ പങ്കെടുത്തു തുടങ്ങിയത്.

ആഡംബര വാഹനങ്ങൾ നേടിയവർ

മക്കളുടെ ജന്മദിന നമ്പറിൽ ആഡംബര കാർ ദുബായിൽ ഹെൽത്ത് ആൻഡ് സേഫ്റ്റി ഇൻസ്‌പെക്ടറായി ജോലി ചെയ്യുന്ന ഇന്ത്യക്കാരനായ സഞ്ജീവ് കാരാട്ടിൽ (45) ഫൈനസ്റ്റ് സർപ്രൈസ് സീരീസ് 1936-ൽ ബിഎംഡബ്ല്യു എക്സ്എം (കേപ് ഗ്രീൻ മെറ്റാലിക്) കാർ സ്വന്തമാക്കി. 17 വർഷമായി ദുബായിൽ പ്രവാസിയായ സഞ്ജീവ്, തന്റെ മക്കളുടെ ജന്മദിന നമ്പറുകൾ ചേർത്താണ് വിജയിച്ച 1631 എന്ന ടിക്കറ്റ് എടുത്തത്.

മലയാളിക്ക് സൂപ്പർ ബൈക്ക് ദുബായിൽ താമസിക്കുന്ന മലയാളി പ്രവാസിയായ സമീർ കുന്നിപ്പറമ്പിലിന് (37) ആണ് ആഡംബര ബൈക്ക് ലഭിച്ചത്. ഫൈനസ്റ്റ് സർപ്രൈസ് സീരീസ് 642-ൽ അദ്ദേഹം ഇന്ത്യൻ സൂപ്പർ സ്കൗട്ട് (മെറൂൺ മെറ്റാലിക്) ബൈക്ക് നേടി. ഒരു ഫുഡ് ട്രേഡിങ് കമ്പനിയിലെ സെയിൽസ് ഉദ്യോഗസ്ഥനായ സമീർ രണ്ട് വർഷമായി ഈ നറുക്കെടുപ്പിൽ സ്ഥിരം പങ്കാളിയാണ്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

മണൽപരപ്പിൽനിന്ന് വൈറൽ പ്രശസ്തിയിലേക്ക്: ‘എക്സിറ്റ് 116’ യുഎഇയുടെ പുതിയ ഡെസേർട്ട് ഹബ്ബായത് എങ്ങനെ?

റാസൽഖൈമ: യുഎഇയിൽ ശൈത്യകാലം ആഗതമായതോടെ, സാഹസിക യാത്രികർ മരുഭൂമിയിലേക്ക് മടങ്ങിയെത്തുകയാണ്. ഊഷ്മളമായ ദിവസങ്ങളും തണുപ്പുള്ള രാത്രികളും സുഹൃത്തുക്കൾക്കും കുടുംബങ്ങൾക്കും ഒത്തുചേരാനും ഔട്ട്‌ഡോർ പ്രവർത്തനങ്ങൾ ആസ്വദിക്കാനും രാജ്യത്തിന്റെ പൈതൃകവുമായി ബന്ധപ്പെടാനും പറ്റിയ ഇടങ്ങളായി വീണ്ടും മാറുന്നു.

വിരസമായ മണൽപ്പരപ്പ് ഒരു ഹോട്ട്‌സ്‌പോട്ടായി:

2022-ന്റെ തുടക്കത്തിൽ റാസൽഖൈമയിലെ താമസക്കാരനായ എമിറാത്തി പൗരൻ മുഹമ്മദ് അൽ മസ്റൂയി എക്സിറ്റ് 116-ലെ മണൽപ്രദേശം സന്ദർശിക്കുകയും അതിൻ്റെ സ്വാഭാവിക സൗന്ദര്യം ഉണ്ടായിട്ടും ആളുകൾ കുറയുന്നത് ശ്രദ്ധിക്കുകയും ചെയ്തു. ഈ കാഴ്ചയാണ് ആ സ്ഥലത്തെ ഊർജ്ജസ്വലമായ ഒരു ലക്ഷ്യസ്ഥാനമാക്കി മാറ്റാൻ അദ്ദേഹത്തിന് പ്രചോദനമായത്.

സ്നാപ്ചാറ്റിലും ഇൻസ്റ്റാഗ്രാമിലുമുള്ള ശക്തമായ സ്വാധീനം ഉപയോഗിച്ച്, മരുഭൂമി, മോട്ടോർസ്‌പോർട്‌സ് പ്രേമികൾക്കുള്ള ഒരു കേന്ദ്രമായി ഈ പ്രദേശത്തെ മാറ്റിയെടുക്കാൻ അദ്ദേഹം പിന്തുണ തേടി.

“അവിടെ രക്ഷാപ്രവർത്തന ടീമുകളോ, പാരാമെഡിക്കൽ ജീവനക്കാരോ, ഒരു സ്ഥാപനമോ ഇല്ലാതെ ഒഴിഞ്ഞുകിടക്കുകയായിരുന്നു. അതിനാൽ, ഞാനും കുറച്ച് സുഹൃത്തുക്കളും ചേർന്ന് സ്ഥലം വൃത്തിയാക്കാനും സംഘടിപ്പിക്കാനും തുടങ്ങി, കൂടാതെ സുരക്ഷിതമാക്കാൻ വളണ്ടിയർ ടീമുകളുമായും പാരാമെഡിക്കൽ ടീമുകളുമായും ഏകോപിപ്പിച്ചു,” അൽ മസ്റൂയി പറഞ്ഞു.

റാസൽഖൈമയിലെ പ്രശസ്തമായ ‘അവാഫി’യെയാണ് ഈ പ്രദേശം തന്നെ ഓർമ്മിപ്പിച്ചതെന്നും, ‘അൽ അർഖൂബ്’ (Al Arqoub – പ്രാദേശിക ഭാഷയിൽ ഉയരമുള്ള മൺകൂന) പോലുള്ള ഡ്യൂൺ ബാഷിംഗ് ഇഷ്ടപ്പെടുന്നവർക്ക് ഇത് പറുദീസയാണെന്നും അദ്ദേഹം വിശദീകരിച്ചു.

ഒരു കൂട്ടായ്മയുടെ വിജയം:

ചെറിയൊരു ശുചീകരണ യജ്ഞമായി ആരംഭിച്ചത് പിന്നീട് ഒരു വലിയ കൂട്ടായ്മയായി വളർന്നു. 30 മുതൽ 50 വരെ യുവ വളണ്ടിയർമാർ ഡെസേർട്ട് ഫാൽക്കൺസ് റെസ്ക്യൂ, RAK വളണ്ടിയർ ടീം, അൽ മുബ്ദാ 700 ടീം തുടങ്ങിയ രക്ഷാപ്രവർത്തന ടീമുകളോടും പാരാമെഡിക്സ്, ഗാരേജ് ഉടമകൾ എന്നിവരോടുമൊപ്പം ചേർന്നു. ഇവർ സുരക്ഷ ഉറപ്പാക്കുകയും ജനക്കൂട്ടത്തെ നിയന്ത്രിക്കുകയും പരിപാടികൾ സംഘടിപ്പിക്കുകയും ചെയ്തു. പ്രാദേശിക ബിസിനസ്സുകളിൽ നിന്നും താമസക്കാരിൽ നിന്നും സഹായങ്ങളും ഉപകരണങ്ങളും ഉൾപ്പെടെയുള്ള പിന്തുണയും ഈ ടീമിന് ലഭിച്ചു.

വൈറൽ പ്രശസ്തി: ഇവരുടെ ശ്രമങ്ങൾ പെട്ടെന്ന് തന്നെ ഓൺലൈനിൽ ശ്രദ്ധ നേടി. നവീകരിച്ച സ്ഥലത്തിൻ്റെ വീഡിയോകൾ വൈറലായതോടെ യുഎഇയുടെ വിവിധ ഭാഗങ്ങളിൽ നിന്നും ഖത്തർ, ബഹ്‌റൈൻ, ഒമാൻ തുടങ്ങിയ ജി.സി.സി. രാജ്യങ്ങളിൽ നിന്നും പ്രവാസികളിൽ നിന്നും സന്ദർശകരെ ആകർഷിച്ചു.

സുരക്ഷാ മുൻഗണന: സുരക്ഷയും നിയമങ്ങൾ പാലിക്കുന്നതും ഉറപ്പുവരുത്തിക്കൊണ്ടാണ് ഓരോ പരിപാടികളും സംഘടിപ്പിക്കുന്നത്. “എല്ലാ വെള്ളിയാഴ്ചയും ഉച്ചയ്ക്ക് ശേഷം മുതൽ പ്രഭാതം വരെ സുരക്ഷിതവും ചിട്ടപ്പെടുത്തിയതുമായ അന്തരീക്ഷത്തിൽ ഞങ്ങൾ ഒത്തുകൂടും. ശുചിത്വത്തെയും സുരക്ഷയെയും കുറിച്ച് അവബോധം വളർത്തുകയും യുവാക്കളെ അവരുടെ ഹോബികൾ ഉത്തരവാദിത്തത്തോടെ പരിശീലിക്കാൻ പ്രോത്സാഹിപ്പിക്കുകയുമാണ് ലക്ഷ്യം,” അദ്ദേഹം പറഞ്ഞു.

ഫലം കണ്ടു: 2024 ആയപ്പോഴേക്കും ഈ കൂട്ടായ പരിശ്രമങ്ങൾ ഫലം കണ്ടു. “ഒരു വർഷത്തെ പ്രവർത്തനത്തിന് ശേഷം, ടീമും ഞാനും യഥാർത്ഥ വിജയം കണ്ടുതുടങ്ങി. ആളുകൾ എല്ലാ ദിക്കിൽ നിന്നും ഒഴുകിയെത്തി, ഈ സ്ഥലം മോട്ടോർസ്‌പോർട്‌സ്, ഡെസേർട്ട് അഡ്വഞ്ചർ പ്രേമികൾക്കിടയിൽ പ്രശസ്തമായി,” അൽ മസ്റൂയി വ്യക്തമാക്കി.

ഈ വിജയം ഒരാളുടെ മാത്രം ശ്രമമല്ല, മറിച്ച് രക്ഷാപ്രവർത്തന ടീമുകൾ, പാരാമെഡിക്കൽ ജീവനക്കാർ, വളണ്ടിയർമാർ എന്നിവരുടെയെല്ലാം സഹകരണത്തിൻ്റെ ഫലമാണെന്നും ഈ സംരംഭം ടൂറിസത്തെയും സംരംഭകത്വത്തെയും പ്രോത്സാഹിപ്പിക്കുമെന്നും അദ്ദേഹം കൂട്ടിച്ചേർത്തു.

അധികാരികളുടെ പിന്തുണ:

നേരത്തെ, ഉമ്മുൽ ഖുവൈൻ കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് റാഷിദ് ബിൻ സൗദ് ബിൻ റാഷിദ് അൽ മുഅല്ല, എമിറേറ്റിൽ മോട്ടോർസ്‌പോർട്‌സിനും മരുഭൂ സാഹസികതയ്ക്കുമായി ഒരു പ്രത്യേക ലക്ഷ്യസ്ഥാനം സ്ഥാപിക്കാൻ നിർദ്ദേശം നൽകിയിരുന്നു. ഉമ്മുൽ ഖുവൈനിന്റെ ടൂറിസം സാധ്യതകൾ വികസിപ്പിക്കാനും കായിക-പരിസ്ഥിതി ടൂറിസത്തിനായുള്ള ഒരു ലക്ഷ്യസ്ഥാനമായി എമിറേറ്റിന്റെ സ്ഥാനം വർദ്ധിപ്പിക്കാനുമാണ് ഈ പദ്ധതി ലക്ഷ്യമിടുന്നത്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

യുഎഇയിലെ പുതിയ നിയമം അറിഞ്ഞോ?; തെറ്റിച്ചാൽ വൻതുക പിഴ

അബുദാബി: ഉൽപന്നങ്ങൾക്കും സേവനങ്ങൾക്കുമുള്ള വില പ്രദർശിപ്പിക്കുമ്പോൾ 5% മൂല്യവർധിത നികുതി (വാറ്റ്) ഉൾപ്പെടെയുള്ള നിരക്ക് മാത്രമേ കാണിക്കാവൂ എന്ന് ഫെഡറൽ ടാക്സ് അതോറിറ്റി (എഫ്.ടി.എ) കർശന നിർദ്ദേശം നൽകി. പ്രദർശിപ്പിച്ച വിലയേക്കാൾ കൂടുതൽ തുക ബില്ലിൽ ഈടാക്കാനാകില്ലെന്നും അധികൃതർ വ്യക്തമാക്കി.ക്രയവിക്രയങ്ങൾ സുതാര്യമാക്കാനും ജനങ്ങളെ കബളിപ്പിക്കുന്നത് ഒഴിവാക്കാനും വേണ്ടിയാണ് എഫ്.ടി.എ നടപടി കർശനമാക്കിയത്.

ഉപഭോക്താക്കളെ ആകർഷിക്കാനായി ചില സ്ഥാപനങ്ങൾ വാറ്റ് ചേർക്കാത്ത കുറഞ്ഞ നിരക്ക് പരസ്യങ്ങളിലും വിലവിവരപ്പട്ടികയിലും പ്രദർശിപ്പിക്കുകയും, കാഷ് കൗണ്ടറിൽ വെച്ച് വാറ്റ് തുക ചേർത്ത് അധിക നിരക്ക് ഈടാക്കുകയും ചെയ്യുന്നത് പതിവായിരുന്നു. ഈ പശ്ചാത്തലത്തിലാണ് എഫ്.ടി.എ വിശദീകരണം നൽകിയത്.

നിയമലംഘനം: പരസ്യത്തിലോ ടാഗിലോ മെനുവിലോ കാണിച്ച നിരക്ക് മാത്രമേ ഉപഭോക്താവിൽ നിന്ന് ഈടാക്കാവൂ. വാറ്റ് ഉൾപ്പെടുത്താത്ത വില വിവര പട്ടിക പ്രദർശിപ്പിക്കുന്നത് യുഎഇയുടെ നികുതി നിയമങ്ങളുടെ ലംഘനമാണ്.

പിഴ: എഫ്.ടി.എ നിയമം ലംഘിക്കുന്ന സ്ഥാപനങ്ങൾക്ക് 5,000 ദിർഹം പിഴ ചുമത്തുമെന്നും അധികൃതർ മുന്നറിയിപ്പ് നൽകി. ഈ രീതി ഉപഭോക്താക്കളെ തെറ്റിദ്ധരിപ്പിക്കുന്നതിലേക്ക് നയിക്കുമെന്നും എഫ്.ടി.എ സൂചിപ്പിച്ചു.

യുഎഇയിൽ എത്തുന്ന വിനോദസഞ്ചാരികൾക്ക് നിയമവിധേയമായി അടച്ച വാറ്റ് തുക വീണ്ടെടുക്കാൻ അവസരമുണ്ട്. ഇതിനായി വിമാനത്താവളത്തിലെ ഡിപ്പാർച്ചർ ടെർമിനലിലുള്ള പ്രത്യേക കൗണ്ടറിൽ രേഖകളും അക്കൗണ്ട് നമ്പറും നൽകി അപേക്ഷിക്കാം.5 പ്രവൃത്തി ദിവസങ്ങൾക്കകം പണം അക്കൗണ്ടിൽ എത്തും. നിയമലംഘനങ്ങൾ ശ്രദ്ധയിൽപ്പെട്ടാൽ 800 82923 എന്ന നമ്പറിലോ tax.gov.ae എന്ന വെബ്സൈറ്റിലോ പരാതിപ്പെടാം.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക* https://chat.whatsapp.com/DfsJVtpVohVHb4aFdLbW46?mode=wwt

35,000 അടി ഉയരത്തിലെ ഹീറോസ്: ആദ്യ വിദേശ യാത്രയിൽ യാത്രക്കാരൻ്റെ ജീവൻ രക്ഷിച്ച് മാതൃകയായി യുഎഇയിലെ പ്രവാസി മലയാളി നേഴ്സുമാർ

അബുദാബി: പുതിയ ജീവിതം തുടങ്ങാൻ യു.എ.ഇയിലേക്ക് പുറപ്പെട്ട രണ്ട് യുവ മലയാളി നഴ്സുമാർക്ക് അവരുടെ ആദ്യ അന്താരാഷ്ട്ര വിമാന യാത്രയിൽ തന്നെ ഹീറോകളായി. ആകാശത്ത് 35,000 അടി ഉയരത്തിൽ വെച്ച് ഹൃദയാഘാതം വന്ന സഹയാത്രികൻ്റെ ജീവനാണ് കോഴിക്കോട് സ്വദേശി അഭിജിത്ത് ജീസും ചെങ്ങന്നൂർ സ്വദേശി അജീഷ് നെൽസണും ചേർന്ന് രക്ഷിച്ചത്.

ഒക്ടോബർ 13 ന് പുലർച്ചെ 5.30-ന് കൊച്ചിയിൽ നിന്ന് അബുദാബിയിലേക്കുള്ള വിമാനം അറബിക്കടലിന് മുകളിലൂടെ പറക്കുമ്പോഴാണ് സംഭവം. യാത്രക്കാർ ഉറക്കത്തിലായിരുന്ന സമയത്ത്, ശ്വാസമെടുക്കാൻ ബുദ്ധിമുട്ടുന്ന ഒരാളുടെ നേരിയ ശബ്ദം അഭിജിത്ത് കേട്ടു.

“ശ്വാസംമുട്ടുന്ന ശബ്ദം കേട്ട് തിരിഞ്ഞുനോക്കിയപ്പോൾ ഒരാൾ സീറ്റിൽ തളർന്ന് കിടക്കുന്നതാണ് കണ്ടത്. പൾസ് പരിശോധിച്ചു, ഇല്ല. അതോടെ ഹൃദയാഘാതമാണെന്ന് മനസ്സിലായി,” അഭിജിത്ത് ഓർത്തെടുത്തു.

സമയം ഒട്ടും കളയാതെ അഭിജിത്ത് സീറ്റിൽ നിന്ന് ചാടി എഴുന്നേറ്റ് വിമാനത്തിൻ്റെ ഇടനാഴിയിൽ വെച്ച് തന്നെ സി.പി.ആർ (CPR) നൽകാൻ തുടങ്ങി. ബഹളം കേട്ട് ഏതാനും വരികൾക്കപ്പുറം സീറ്റിലിരുന്ന അജീഷും സഹായത്തിന് എത്തി.

“ഒട്ടും പരിഭ്രമമുണ്ടായില്ല. എന്താണ് ചെയ്യേണ്ടതെന്ന് ഞങ്ങൾക്ക് അറിയാമായിരുന്നു. അഭിജിത്ത് നെഞ്ചിൽ അമർത്താൻ തുടങ്ങി, ഞാൻ പിന്തുണ നൽകി. ശാന്തമായി ഞങ്ങളാൽ കഴിയുന്നത് ചെയ്യുക എന്നതായിരുന്നു ലക്ഷ്യം,” അജീഷ് പറഞ്ഞു.

ഇരുവരും മാറിമാറി സി.പി.ആർ നൽകി. വിമാനത്തിൻ്റെ ഇടുങ്ങിയ ഇടനാഴി ഒരു അടിയന്തര ചികിത്സാ വാർഡിന് തുല്യമായി മാറി. രണ്ട് തവണ തീവ്രമായ സി.പി.ആർ നൽകിയതിന് ശേഷം, രോ​ഗിക്ക് നേരിയ ചലനം ഉണ്ടായി, പൾസ് തിരികെ വന്നു, അദ്ദേഹം വീണ്ടും ശ്വാസമെടുക്കാൻ തുടങ്ങി.

“അദ്ദേഹത്തിന്റെ മാറ്റം കണ്ടപ്പോൾ വലിയ ആശ്വാസം തോന്നി. എന്തുകൊണ്ടാണ് ഞങ്ങൾ ഈ തൊഴിൽ തിരഞ്ഞെടുത്തതെന്ന് ആ നിമിഷം ഓർമ്മിപ്പിച്ചു. നമ്മൾ എവിടെയായിരുന്നാലും ആ ഉത്തരവാദിത്തം നമ്മളോടൊപ്പം ഉണ്ടാകും,” അഭിജിത്ത് പറഞ്ഞു.

യാത്രക്കാരിൽ ഡോ. ആരിഫ് അബ്ദുൾ ഖാദർ ഉണ്ടായിരുന്നു. അദ്ദേഹം സഹായവുമായി മുന്നോട്ട് വന്നു. നഴ്സുമാർക്കൊപ്പം ചേർന്ന് ഡോക്ടർ, രോ​ഗിയുടെ നില മെച്ചപ്പെടുത്തുകയും ഐ.വി. ഫ്ലൂയിഡുകൾ നൽകി വിമാനമിറങ്ങുന്നത് വരെ നിരീക്ഷിക്കുകയും ചെയ്തു.

“ഇതായിരുന്നു ഞങ്ങളുടെ ആദ്യ വിദേശ യാത്ര. പുതിയ ജോലിയിൽ പ്രവേശിക്കുന്നതിന് മുമ്പ് ഒരു ജീവൻ രക്ഷിക്കാൻ കഴിഞ്ഞത് സങ്കൽപ്പിക്കാൻ കഴിയുന്നതിലും മികച്ച വരവേൽപ്പ് ആയിരുന്നു,” അജീഷ് കൂട്ടിച്ചേർത്തു.

വിമാനം അബുദാബിയിൽ ലാൻഡ് ചെയ്തപ്പോൾ എയർപോർട്ട് മെഡിക്കൽ ടീം തയ്യാറായിരുന്നു. രോ​ഗിയെ തുടർ ചികിത്സയ്ക്കായി ആശുപത്രിയിലേക്ക് മാറ്റുകയും നിലവിൽ അദ്ദേഹം സുഖം പ്രാപിക്കുകയും ചെയ്യുന്നു.

വയനാട് സ്വദേശി അഭിജിത്തും (26) ചെങ്ങന്നൂർ സ്വദേശി അജീഷും (29) യു.എ.ഇയിലെ പ്രമുഖ എമർജൻസി മെഡിക്കൽ സർവ്വീസ് ദാതാക്കളായ റെസ്പോൺസ് പ്ലസ് മെഡിക്കൽ (RPM) എന്ന സ്ഥാപനത്തിലെ പുതിയ ജീവനക്കാരായിരുന്നു. വിമാനത്തിൽ നടന്ന സംഭവം ആരോടും പറയാതെ ഇരുവരും പുതിയ ജോലിസ്ഥലത്തേക്ക് പോയി. എന്നാൽ, ഇതേ സ്ഥാപനത്തിലെ മറ്റൊരു സഹയാത്രികൻ ഈ ധീരകൃത്യം അധികൃതരെ അറിയിച്ചതോടെയാണ് സംഭവം പുറത്തറിയുന്നത്. ഇവരുടെ പ്രൊഫഷണലിസവും സംയമനവും തിരിച്ചറിഞ്ഞ RPM മാനേജ്മെൻ്റ്, ഇരുവർക്കും പ്രശംസാ പത്രങ്ങൾ നൽകി ആദരിച്ചു.

“ആശുപത്രി പരിതസ്ഥിതിക്ക് പുറത്ത് ഒരു രോഗിയെ രക്ഷിച്ചതിലൂടെ അജീഷും അഭിജിത്തും RPM-ൻ്റെ യഥാർത്ഥ സ്പിരിറ്റ് ആണ് കാണിച്ചത്,” റെസ്പോൺസ് പ്ലസ് ഹോൾഡിംഗ് സി.ഇ.ഒ ഡോ. റോഹിൽ രാഘവൻ പറഞ്ഞു.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt