‘വലിയപെരുന്നാള്‍ അവധിക്കാലത്ത് ശമ്പളം വെട്ടിക്കുറയ്ക്കും’; പ്രതിഷേധവുമായി യുഎഇയിലെ അധ്യാപകര്‍
വരാനിരിക്കുന്ന ഈദ് അല്‍ അദ്ഹ അവധി ദിനങ്ങള്‍ക്കായി തയ്യാറെടുക്കുകയാണ് യുഎഇ. ജൂൺ അഞ്ച് മുതൽ എട്ട് വരെയാണ് രാജ്യത്ത് വലിയ പെരുന്നാള്‍ അവധിദിനങ്ങള്‍. ഈ ദിവസങ്ങളില്‍ ശമ്പളം വെട്ടിക്കുറയ്ക്കുമെന്ന അറിയിപ്പില്‍ ആശങ്കാകുലരായിരിക്കുകയാണ് നിരവധി സ്കൂൾ അധ്യാപകർ. അന്യായവും നിയമവിരുദ്ധവുമായ ഒരു നടപടിയാണെന്ന് അവര്‍ അഭിപ്രായപ്പെട്ടു. 2021 ലെ ഫെഡറൽ ഡിക്രി നിയമ നമ്പർ (33) ലെ ആർട്ടിക്കിൾ 28 പ്രകാരം, യുഎഇ മന്ത്രിസഭ പ്രഖ്യാപിച്ച പൊതു അവധി ദിവസങ്ങളിൽ ജീവനക്കാർക്ക് പൂർണവേതനത്തിന് അർഹതയുണ്ട്. വാർഷിക അവധി കാലയളവിനുള്ളിൽ ഒരു പൊതു അവധി വരുന്നുണ്ടെങ്കിൽ, അത് ശമ്പളത്തിൽ നിന്നോ അവധി ബാലൻസിൽ നിന്നോ കുറയ്ക്കാന്‍ പാടില്ല.
എന്നിരുന്നാലും, പല സ്കൂളുകളിലും ഇത് തന്നെയാണ് സംഭവിക്കുന്നതെന്ന് പല അധ്യാപകരും പറയുന്നു. “വിദേശത്തുള്ള കുടുംബത്തെ സന്ദർശിക്കാൻ ഈദിന് മൂന്ന് ദിവസം മുന്‍പ് അവധിയെടുത്തു,” ദുബായിലെ ഒരു ബ്രിട്ടീഷ് കരിക്കുലം സ്കൂളിലെ അധ്യാപകൻ പറഞ്ഞു. “എന്നാൽ ഈദ് അവധി ദിനങ്ങളും വാരാന്ത്യവും ഉൾപ്പെടെ മുഴുവൻ ആഴ്ചയും ശമ്പളം കുറയ്ക്കുമെന്ന് എച്ച്ആർ ഇതിനകം പറഞ്ഞിട്ടുണ്ട്. അധികൃതരോട് ഇതേ കുറിച്ച് ചോദിച്ചപ്പോള്‍ എല്ലായ്പ്പോഴും ഇങ്ങനെയാണ് ചെയ്യുന്നതെന്നും വേനൽക്കാലത്തും ശൈത്യകാലത്തും അധ്യാപകർക്ക് ഇതിനകം തന്നെ മതിയായ അവധി ലഭിക്കുന്നുണ്ടെന്നും അവർ പറഞ്ഞു.”
അധ്യാപകരുടെ അഭിപ്രായത്തിൽ, തിങ്കളാഴ്ച പോലുള്ള ഒരു ദിവസത്തെ അവധി പോലും ഞായറാഴ്ചയുമായി ചേർത്തിരിക്കുന്നതിനാൽ രണ്ട് ദിവസത്തെ ശമ്പളം നഷ്ടപ്പെടാൻ ഇടയാക്കും. “തിങ്കളാഴ്ച അവധിയെടുക്കുകയാണെങ്കിൽ, അവർ ഞായറാഴ്ചയും തിങ്കളാഴ്ചയും അവധിയായി കണക്കാക്കുകയും അതിനനുസരിച്ച് ശമ്പളം കുറയ്ക്കുകയും ചെയ്യുന്നു,” ഒരു ഇന്ത്യൻ സ്കൂളിലെ മറ്റൊരു അധ്യാപിക പറഞ്ഞു. തൊഴിൽ കരാറുകളും ശമ്പള കിഴിവുകളും സംബന്ധിച്ച കാര്യങ്ങൾ മാനവ വിഭവശേഷി, സ്വദേശിവൽക്കരണ മന്ത്രാലയത്തിന്റെ (MoHRE) അധികാരപരിധിയിൽ വരുമെന്ന് ദുബായിലെ സ്വകാര്യ സ്‌കൂളുകളെ നിയന്ത്രിക്കുന്ന നോളജ് ആൻഡ് ഹ്യൂമൻ ഡെവലപ്‌മെന്റ് അതോറിറ്റി (KHDA) പറഞ്ഞു. പൊതു അവധി ദിനങ്ങൾ വാർഷിക അവധിയിൽ നിന്ന് വ്യത്യസ്തമാണെന്ന് വ്യക്തമാക്കുന്ന വ്യക്തമായ മാർഗ്ഗനിർദ്ദേശങ്ങൾ ഉണ്ടെന്ന് മൊഹ്റെ വക്താവ് സ്ഥിരീകരിച്ചു. “ഈദ് അവധി ദിനങ്ങൾ ഈദ് അവധി ദിനങ്ങളാണ്, സ്ഥാപനങ്ങൾ നിയമം പാലിക്കണം,” അദ്ദേഹം പറഞ്ഞു.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/EvsyvV3gKrEHNC3r1sci6g
Comments (0)