UAE e-scooter rules 2027; യുഎഇയിൽ ഇലക്ട്രിക് സ്കൂട്ടറുകൾ ഓടിക്കുന്നതിന് പെർമിറ്റ് നിർബന്ധമാക്കി പുതിയ ഫെഡറൽ ഗതാഗത നിയമം പ്രാബല്യത്തിൽ വരുന്നു. 2027 ജനുവരി 1 മുതൽ നടപ്പിലാകുന്ന പുതിയ ചട്ടങ്ങൾ പ്രകാരം ഇ-സ്കൂട്ടർ പെർമിറ്റിനായി അപേക്ഷിക്കാനുള്ള കുറഞ്ഞ പ്രായപരിധി 15 വയസ്സായി നിശ്ചയിച്ചു. 2026-ലെ കാബിനറ്റ് പ്രമേയം നമ്പർ 174 അനുസരിച്ചുള്ള എക്സിക്യൂട്ടീവ് നിയമാവലിയിലാണ് ഇക്കാര്യം വ്യക്തമാക്കുന്നത്. പുതിയ ഉത്തരവ് പ്രകാരം അനുവദിക്കുന്ന പെർമിറ്റുകൾക്ക് മൂന്ന് വർഷത്തെ കാലാവധിയുണ്ടാകും. ഇ-സ്കൂട്ടറുകൾക്ക് പുറമെ ഇലക്ട്രിക് സൈക്കിളുകൾ, മോപ്പഡുകൾ എന്നിവയുൾപ്പെടെയുള്ള എല്ലാ വ്യക്തിഗത മൊബിലിറ്റി ഉപകരണങ്ങൾക്കും ഈ നിയന്ത്രണങ്ങൾ ബാധകമാണ്. ഇവ ഉപയോഗിക്കുന്നതിന് മുൻപായി ബന്ധപ്പെട്ട ലൈസൻസിങ് അതോറിറ്റിയിൽ നിന്ന് പെർമിറ്റും രജിസ്ട്രേഷനും സ്വന്തമാക്കേണ്ടത് അനിവാര്യമാണ്. ഫെഡറൽ തലത്തിൽ കുറഞ്ഞ പ്രായപരിധി 15 വയസ്സായി നിശ്ചയിച്ചെങ്കിലും, ദുബായിൽ നിലവിലെ നിയമപ്രകാരം 16 വയസ്സിന് താഴെയുള്ളവർക്ക് ഇ-സ്കൂട്ടർ ഉപയോഗിക്കാൻ അനുമതിയില്ല. ദുബായിലെ നിലവിലെ വ്യവസ്ഥയും പുതിയ ഫെഡറൽ നിയമവും തമ്മിലുള്ള ഏകോപനത്തെക്കുറിച്ച് വരുംദിവസങ്ങളിൽ കൂടുതൽ വ്യക്തത വരും. ട്രാഫിക് സിഗ്നലുകളിലും സഞ്ചാരപാതകളിലും പുതിയ നിയമം കർശന വ്യവസ്ഥകളാണ് മുന്നോട്ടുവെക്കുന്നത്. ചുവപ്പ് സിഗ്നലുള്ളപ്പോൾ റോഡ് മുറിച്ചുകടക്കാൻ പാടില്ല. പച്ച സിഗ്നൽ ലഭിച്ചാൽ മാത്രമേ ക്രോസിംഗ് അനുവദിക്കൂ. പച്ച ലൈറ്റ് മിന്നിമറയാൻ (ഫ്ലാഷ് ചെയ്യാൻ) തുടങ്ങുമ്പോൾ റോഡ് മുറിച്ചുകടക്കാൻ ശ്രമിക്കരുത്. എന്നാൽ സിഗ്നൽ മാറ്റത്തിന് മുൻപേ റോഡിലിറങ്ങിയവർക്ക് യാത്ര പൂർത്തിയാക്കാം. ഇ-സ്കൂട്ടറുകളിൽ രാത്രിയിൽ റോഡ് വ്യക്തമായി കാണാൻ സഹായിക്കുന്ന ഹെഡ്‌ലൈറ്റ്, പിൻഭാഗത്തെ ലൈറ്റ്, ബ്രേക്ക് ചെയ്യുമ്പോൾ തെളിയുന്ന ചുവന്ന ബ്രേക്ക് ലൈറ്റ്, മുന്നറിയിപ്പ് നൽകാനുള്ള ഹോൺ അല്ലെങ്കിൽ ബെൽ എന്നിവ നിർബന്ധമാണ്. കൂടാതെ പിൻചക്രത്തിലെങ്കിലും കാര്യക്ഷമമായ ബ്രേക്കും സുരക്ഷിതമായ ടയറുകളും ഉണ്ടായിരിക്കണം.
അതോറിറ്റികൾ നിശ്ചയിച്ചിട്ടുള്ള പ്രത്യേക ട്രാക്കുകളിലൂടെ മാത്രമേ ഇവ ഓടിക്കാൻ അനുമതിയുള്ളൂ. സാധാരണ മോട്ടോർ വാഹനങ്ങൾ സഞ്ചരിക്കുന്ന പ്രധാന പാതകളിൽ ഇ-സ്കൂട്ടറുകൾക്ക് പ്രവേശനമുണ്ടാകില്ല. സ്വന്തം വാഹനങ്ങൾക്കും വാടകയ്‌ക്കെടുക്കുന്നവയ്ക്കും ഈ നിയമങ്ങൾ ഒരുപോലെ ബാധകമാണ്. രാജ്യത്ത് ഇ-സ്കൂട്ടർ അപകടങ്ങൾ വർദ്ധിച്ചുവരുന്ന പശ്ചാത്തലത്തിലാണ് ഫെഡറൽ തലത്തിൽ കടുത്ത സുരക്ഷാ ക്രമീകരണങ്ങൾ നടപ്പിലാക്കുന്നത്. 2025-ൽ മുൻവർഷത്തെ അപേക്ഷിച്ച് ഗുരുതര ഇ-സ്കൂട്ടർ അപകടങ്ങളിൽ 97 ശതമാനം വർദ്ധനവ് രേഖപ്പെടുത്തിയിരുന്നു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t