പ്രായമായവരെ മാത്രം ബാധിക്കുന്ന ഒന്നെന്ന ധാരണ തിരുത്തിക്കുറിച്ച്, ഇന്ന് ചെറുപ്പക്കാരിലും പ്രവാസികളിലും ഹൃദയാഘാത കേസുകൾ വൻതോതിൽ വർദ്ധിച്ചുവരികയാണ്. ഇന്ത്യയിൽ 20, 30, 40 വയസ്സുകളിലുള്ളവരിൽ ഹൃദ്രോഗങ്ങൾ വർദ്ധിക്കാൻ പ്രധാന കാരണം മാറിയ ജീവിതശൈലി തന്നെയാണ്.
മറ്റ് രാജ്യക്കാരെ അപേക്ഷിച്ച് ജനിതകമായി തന്നെ ഇന്ത്യക്കാർക്ക് ഹൃദ്രോഗ സാധ്യത കൂടുതലാണെന്നാണ് പഠനങ്ങൾ പറയുന്നത്. അതിനാൽ 30 വയസ്സ് കഴിഞ്ഞവർ കൃത്യമായ ഇടവേളകളിൽ ഹൃദയപരിശോധനകൾ നടത്തേണ്ടത് അനിവാര്യമാണ്. ജിമ്മിൽ പോയി കഠിനമായ വ്യായാമങ്ങൾ തുടങ്ങുന്നതിന് മുൻപും പരിശോധന നടത്തുന്നത് നന്നായിരിക്കും.
ചെറുപ്പക്കാരിൽ ഹൃദയാഘാതത്തിന് കാരണമാകുന്ന ആ 5 പ്രധാന വില്ലന്മാർ ഇവയൊക്കെയാണ്:
- വിട്ടുമാറാത്ത മാനസിക സമ്മർദ്ദം (Chronic Stress)
അമിതമായ മാനസിക സംഘർഷവും പിരിമുറുക്കവും ശരീരത്തിൽ കോർട്ടിസോൾ, അഡ്രിനാലിൻ എന്നീ ഹോർമോണുകളുടെ അളവ് കൂട്ടുന്നു. ഇത് രക്തസമ്മർദ്ദം വർദ്ധിപ്പിക്കുകയും ധമനികളിൽ പ്ലാക്ക് അടിഞ്ഞുകൂടുന്നത് വേഗത്തിലാക്കുകയും ചെയ്യുന്നു. അതിനാൽ കൃത്യമായ ‘വർക്ക്-ലൈഫ് ബാലൻസ്’ നിലനിർത്താൻ പ്രത്യേകം ശ്രദ്ധിക്കണം. - ഉറക്കമില്ലായ്മയും തെറ്റായ ഭക്ഷണസമയവും
കൃത്യമായ ഉറക്കം ലഭിക്കാത്തത് ഹൃദയാരോഗ്യത്തെ സാരമായി ബാധിക്കും. മണിക്കൂറുകളുടെ എണ്ണത്തേക്കാൾ പ്രധാനം ആഴത്തിലുള്ള നല്ല ഉറക്കമാണ്. പകൽ സമയത്തെ ചെറിയൊരു വിശ്രമം (അര മണിക്കൂർ) സമ്മർദ്ദം കുറയ്ക്കാനും പഞ്ചസാരയുടെ അളവ് നിയന്ത്രിക്കാനും സഹായിക്കും. രാത്രി ഭക്ഷണം കഴിഞ്ഞ് കുറഞ്ഞത് 2 മണിക്കൂർ കഴിഞ്ഞതിന് ശേഷം മാത്രം ഉറങ്ങാൻ കിടക്കുക. - വ്യായാമമില്ലായ്മ
ദിവസവും അൽപനേരം മിതമായ രീതിയിൽ വ്യായാമം ചെയ്യുന്നത് ഹൃദയപേശികളെ ശക്തിപ്പെടുത്തുകയും രക്തചംക്രമണം മെച്ചപ്പെടുത്തുകയും ചെയ്യും. ഇത് ഹൃദയത്തിന് കൂടുതൽ സുഗമമായി രക്തം പമ്പ് ചെയ്യാൻ കരുത്ത് നൽകുന്നു. - പുകവലിയും വാപ്പിംഗും (Smoking & Vaping)
ചെറുപ്പക്കാരിലെ ഹൃദയാഘാതത്തിന് ഏകദേശം 36% കാരണമാകുന്നത് പുകവലിയാണ്. ഇതിലടങ്ങിയിരിക്കുന്ന നിക്കോട്ടിൻ രക്തക്കുഴലുകളെ തകരാറിലാക്കുകയും രക്തം കട്ടപിടിക്കാനുള്ള സാധ്യത വൻതോതിൽ വർദ്ധിപ്പിക്കുകയും ചെയ്യുന്നു. - ജങ്ക് ഫുഡും പൊണ്ണത്തടിയും
സംസ്കരിച്ച ഭക്ഷണങ്ങൾ, വറുത്തതും പൊരിച്ചതുമായ വിഭവങ്ങൾ, പാക്കറ്റ് കേക്കുകൾ എന്നിവയിലെ ട്രാൻസ് ഫാറ്റും സാച്ചുറേറ്റഡ് ഫാറ്റും ശരീരത്തിലെ ചീത്ത കൊളസ്ട്രോൾ (LDL) വർദ്ധിപ്പിക്കുന്നു. ഇത് ധമനികൾ അടഞ്ഞുപോകുന്ന ‘അഥെറോസ്ക്ലെറോസിസ്’ എന്ന അവസ്ഥയിലേക്കും തുടർന്ന് ഹൃദയാഘാതത്തിലേക്കും നയിക്കുന്നു.
ആരോഗ്യകരമായ ഭക്ഷണരീതിയും, മിതമായ വ്യായാമവും, കൃത്യമായ ഹൃദയ പരിശോധനകളും വഴി നമുക്ക് ഈ അപകടത്തെ ഒരു പരിധി വരെ ചെറുത്തുതോൽപ്പിക്കാം.
