യാത്രക്കാർക്ക് ആശ്വാസമായി ഷാർജയിലെ അൽ ദൈദ് പാലം തുറന്നു; മണിക്കൂറിൽ 6,000 വാഹനങ്ങൾ

Sharjah Al Dhaid bridge; ഷാർജയിലെ അൽ ദൈദ് നഗരത്തിലേക്കുള്ള 320 മീറ്റർ നീളമുള്ള പുതിയ പ്രവേശന പാലം ഇന്ന് ഉദ്ഘാടനം ചെയ്തു. ‘അൽ ദൈദ് തടാകം-പാലം’ പദ്ധതിയുടെ ആദ്യ ഘട്ടമാണ് ഇതോടെ പൂർത്തിയായത്. പദ്ധതി നിർവഹണ അതോറിറ്റിയായ ‘മുബാദര’യും ഷാർജ റോഡ് ട്രാൻസ്‌പോർട്ട് അതോറിറ്റിയും ചേർന്നാണ് പാലം തുറന്നുകൊടുത്തത്. പാലത്തിന് താഴെയുള്ള അൽ ദൈദ് തടാകത്തിന്റെ നിർമാണം തുടരുകയാണ്. 2027-ന്റെ മൂന്നാം പാദത്തിൽ തടാകം പൂർത്തിയാകുമെന്നാണ് പ്രതീക്ഷ. ഏകദേശം 4,60,000 ചതുരശ്ര മീറ്റർ വിസ്തൃതിയുള്ള ഈ തടാകത്തിൽ നിർമാണം പൂർത്തിയാകുമ്പോൾ 40 കോടി (400 മില്യൺ) ഗാലൻ വെള്ളം ഉൾക്കൊള്ളുമെന്ന് മുബാദര ചെയർമാൻ ഡോ. എൻജി. സലാഹ് ബിൻ ബുട്ടി അൽ മുഹൈരി അറിയിച്ചു. തടാകത്തിന് മുകളിലൂടെ കടന്നുപോകുന്ന പുതിയ പാലത്തിന് 50 മീറ്റർ വീതിയുണ്ട്. ഇതിലേക്കുള്ള റോഡിന് ഏകദേശം 2,300 മീറ്റർ നീളമുണ്ട്. ഇത് പദ്ധതിയിലേക്കുള്ള യാത്ര എളുപ്പമാക്കുകയും ചുറ്റുമുള്ള റോഡുകളുമായി ബന്ധിപ്പിക്കുകയും ചെയ്യുന്നു. മണിക്കൂറിൽ 6,000 വാഹനങ്ങൾക്ക് വരെ ഇതിലൂടെ സഞ്ചരിക്കാം. ടോൾ ഗേറ്റിലേക്ക് പോകുന്ന ട്രക്കുകൾക്കായി 280 മീറ്റർ റാമ്പും, ഷാർജ നഗരത്തിലേക്ക് പോകുന്ന ട്രക്കുകൾക്കായി 160 മീറ്റർ റാമ്പും ഒരുക്കിയിട്ടുണ്ട്. അയൽ പ്രദേശങ്ങളായ ജബൽ ഒമർ, അൽ തയ്യിബ, തെൽ അൽ സഫ്രാൻ എന്നിവിടങ്ങളിലേക്കുള്ള യാത്ര എളുപ്പമാക്കാൻ ആകെ 108 മീറ്റർ നീളമുള്ള അണ്ടർപാസുകളും നിർമിച്ചിട്ടുണ്ട്.
അൽ ദൈദ് നഗരത്തിലെ റോഡ് ശൃംഖലയുടെ വികസനം പൊതുഗതാഗത സേവനങ്ങൾ കൂടുതൽ മെച്ചപ്പെടുത്താനുള്ള ശ്രമങ്ങൾക്ക് കരുത്തുപകരുമെന്ന് അൽ മുഹൈരി വ്യക്തമാക്കി. അൽ ദൈദിലെ ഇത്തിഹാദ് റെയിൽ സ്റ്റേഷനെ മറ്റ് പ്രധാന ബസ് സ്റ്റേഷനുകളുമായി ബന്ധിപ്പിക്കുന്ന മൂന്ന് ബസ് റൂട്ടുകൾ വഴിയാണ് ഇത് സാധ്യമാക്കുന്നത്. അൽ മദാം ബസ് സ്റ്റേഷൻ (ER1), അൽ സജാ ബസ് സ്റ്റേഷൻ (ER2), ഷാർജയിലെ അൽ ജുബൈൽ ബസ് സ്റ്റേഷൻ (ER3) എന്നിവയെയാണ് ഈ ബസ് സർവീസുകൾ ബന്ധിപ്പിക്കുന്നത്.  യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t

Related Posts

Leave a Reply

Your email address will not be published. Required fields are marked *

© 2026 Pravasi Varthakal - WordPress Theme by WPEnjoy