Malayali family died in UAE; യുഎഇയിലെ ഫുജൈറയിലുണ്ടായ ദാരുണമായ വാഹനാപകടത്തിൽ മലയാളി കുടുംബത്തിലെ മൂന്ന് പേർക്ക് ദാരുണാന്ത്യം. ബുധനാഴ്ച അർധരാത്രിക്ക് ശേഷം ഷെയ്ഖ് ഖലീഫ ബിൻ സായിദ് സ്ട്രീറ്റിലായിരുന്നു നാടിനെ നടുക്കിയ അപകടം നടന്നത്. മലപ്പുറം കുന്നുംപുറം കുണ്ടിൽപ്പാറ സ്വദേശി സിദ്ധിഖിന്റെ മക്കളായ മുഹമ്മദ് അസ്മിൽ (21), മിസ്ന ജുബിൻ (21), മിസ്നയുടെ മകൻ മൂന്ന് വയസ്സുകാരൻ മുഹമ്മദ് ഫായിസ് എന്നിവരാണ് മരിച്ചത്. ഇവർ സഞ്ചരിച്ചിരുന്ന കാർ ഫുജൈറ കോടതിക്ക് സമീപത്തുവെച്ച് നിയന്ത്രണം വിട്ട് ട്രക്കിന്റെ പിന്നിൽ ഇടിക്കുകയായിരുന്നു. അപകടത്തിൽ ട്രക്കും മറ്റ് നിരവധി വാഹനങ്ങളും കൂട്ടിയിടിച്ചതായി ഫുജൈറ പോലീസ് സ്ഥിരീകരിച്ചു. സംഭവസ്ഥലത്ത് വെച്ചുതന്നെ നിരവധി പേർക്ക് ജീവൻ നഷ്ടപ്പെടുകയും മറ്റ് പലർക്കും ഗുരുതരമായി പരിക്കേൽക്കുകയും ചെയ്തിട്ടുണ്ട്. ഫുജൈറ പോലീസ് ജനറൽ കമാൻഡിന്റെ നേതൃത്വത്തിൽ രക്ഷാപ്രവർത്തനങ്ങൾ ഏകോപിപ്പിക്കുകയും അപകടത്തെക്കുറിച്ച് വിശദമായ അന്വേഷണം ആരംഭിക്കുകയും ചെയ്തിട്ടുണ്ട്. അപകടത്തെക്കുറിച്ചുള്ള കൂടുതൽ വിവരങ്ങൾ അധികൃതർ പുറത്തുവിട്ടു വരുന്നതേയുള്ളൂ.