Kuwait emergency police; പൊതുജനങ്ങളുമായുള്ള ഇടപെടലുകൾ കൂടുതൽ സുതാര്യമാക്കുന്നതിനും സുരക്ഷാ പ്രവർത്തനങ്ങൾ കാര്യക്ഷമമാക്കുന്നതിനുമായി കുവൈത്ത് ജനറൽ ഡയറക്ടറേറ്റ് ഓഫ് എമർജൻസി പോലീസ് വലിയ മാറ്റങ്ങളിലേക്ക്. എല്ലാ എമർജൻസി പോലീസ് ഉദ്യോഗസ്ഥരും ഇനി മുതൽ വ്യക്തിഗത ബോഡി ക്യാമറകൾ ധരിക്കണമെന്ന് അധികൃതർ നിർദ്ദേശിച്ചു. ഉദ്യോഗസ്ഥരുടെയും പൊതുജനങ്ങളുടെയും അവകാശങ്ങൾ സംരക്ഷിക്കുക എന്നതാണ് ഈ പദ്ധതിയുടെ പ്രധാന ലക്ഷ്യമെന്ന് എമർജൻസി പോലീസ് മേധാവി ബ്രിഗേഡിയർ ജനറൽ ഹംലാൻ ഹദിരി അൽ-ഹംലാൻ വ്യക്തമാക്കി. ഓഫീസുകളിലെ കടലാസ് ജോലികൾ പൂർണ്ണമായും ഒഴിവാക്കി സേവനം പൂർണ്ണമായി ഡിജിറ്റൽ ആക്കാനുള്ള ശ്രമത്തിലാണ് എമർജൻസി പോലീസ്. ഓപ്പറേഷൻ റൂമുകൾ, പട്രോൾ യൂണിറ്റുകൾ, പരാതി സ്വീകരിക്കുന്ന സംവിധാനം എന്നിവയെ പരസ്പരം ബന്ധിപ്പിക്കുന്നത് വഴി വിവരങ്ങൾ അതിവേഗം കൈമാറാനും അത്യാഹിതങ്ങളോട് മിന്നൽ വേഗത്തിൽ പ്രതികരിക്കാനും സാധിക്കും. എല്ലാ പെട്രോൾ വാഹനങ്ങളിലും റസീദ് സിസ്റ്റം സംവിധാനം ഘടിപ്പിച്ചിട്ടുണ്ട്. നിയമലംഘകരെയും പിടികിട്ടാപ്പുള്ളികളെയും തത്സമയം തിരിച്ചറിയാൻ ഇത് ഉദ്യോഗസ്ഥരെ സഹായിക്കുന്നു. പെട്രോൾ വാഹനങ്ങളുടെ അകത്തും പുറത്തും ആധുനിക ക്യാമറകൾ സജ്ജീകരിച്ചിട്ടുണ്ട്. കുറ്റകൃത്യങ്ങൾ കൂടുതലുള്ള മേഖലകളും സമയങ്ങളും ഡാറ്റാ വിശകലനത്തിലൂടെ കണ്ടെത്തി, അതിനനുസരിച്ചുള്ള പട്രോളിംഗ് നടത്തുന്നു. ഇതിനുപുറമെ, ഉദ്യോഗസ്ഥർക്കായി ക്രൈസിസ് മാനേജ്‌മെന്റ്, ആയുധ പരിശീലനം, പ്രഥമ ശുശ്രൂഷ, ജനങ്ങളോട് എങ്ങനെ പെരുമാറണം തുടങ്ങിയ വിഷയങ്ങളിൽ പ്രത്യേക പരിശീലന പരിപാടികളും നൽകിവരുന്നുണ്ട്. വികസിത രാജ്യങ്ങളിലെ സുരക്ഷാ രീതികളെ മാതൃകയാക്കിയാണ് കുവൈത്ത് പോലീസ് തങ്ങളുടെ സേവനം ആധുനികവൽക്കരിക്കുന്നത്. കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/ENPscRffOwo5x6O0PjsEUa?s=cl&p=a&ilr=1

കുവൈത്തിലെ പുതിയ ജോലി അവസരങ്ങൾ അറിയുവാൻ ഇവിടെ ക്ലിക്ക് ചെയ്യുക

കുവൈറ്റ് ആകാശത്ത് മിസൈൽ ആക്രമണം; 24 മണിക്കൂറിനിടെ 5 ബാലിസ്റ്റിക് മിസൈലുകളും 7 ഡ്രോണുകളും വെടിവെച്ചിട്ട് വ്യോമപ്രതിരോധ സേന

കുവൈറ്റിന്റെ ആകാശപരിധി ലക്ഷ്യമിട്ടെത്തിയ വൻ വ്യോമാക്രമണ ശ്രമങ്ങളെ രാജ്യം വിജയകരമായി പ്രതിരോധിച്ചു. കഴിഞ്ഞ 24 മണിക്കൂറിനിടെ അഞ്ച് ബാലിസ്റ്റിക് മിസൈലുകളെയും ഏഴ് ഡ്രോണുകളെയുമാണ് കുവൈറ്റ് വ്യോമപ്രതിരോധ സേന ആകാശത്തുവെച്ച് തന്നെ തകർത്തത്. ശത്രുരാജ്യങ്ങളുടെ ഭാഗത്തുനിന്നുണ്ടായ പ്രകോപനങ്ങളെ അതിശക്തമായ രീതിയിൽ നേരിടാൻ രാജ്യത്തിന്റെ പ്രതിരോധ സംവിധാനങ്ങൾക്ക് സാധിച്ചു എന്നത് സൈന്യത്തിന്റെ കരുത്ത് തെളിയിക്കുന്ന ഒന്നായി മാറി. രാജ്യത്തെ തന്ത്രപ്രധാനമായ കേന്ദ്രങ്ങളെയും ജനവാസ മേഖലകളെയും ലക്ഷ്യമാക്കിയാണ് ഈ ആക്രമണങ്ങൾ ആസൂത്രണം ചെയ്തിരുന്നത്. എന്നാൽ അത്യാധുനികമായ റഡാർ സംവിധാനങ്ങളും മിസൈൽ പ്രതിരോധ കവചങ്ങളും കൃത്യസമയത്ത് പ്രവർത്തിച്ചതോടെ വലിയൊരു ദുരന്തമാണ് ഒഴിവായത്. വെടിവെച്ചിട്ട മിസൈലുകളുടെയും ഡ്രോണുകളുടെയും അവശിഷ്ടങ്ങൾ വിജനമായ പ്രദേശങ്ങളിൽ വീണതായാണ് റിപ്പോർട്ടുകൾ സൂചിപ്പിക്കുന്നത്. സംഭവത്തിൽ ആർക്കും പരിക്കേൽക്കുകയോ നാശനഷ്ടങ്ങൾ സംഭവിക്കുകയോ ചെയ്തിട്ടില്ലെന്ന് ഔദ്യോഗിക വൃത്തങ്ങൾ വ്യക്തമാക്കി. മേഖലയിൽ നിലനിൽക്കുന്ന സംഘർഷാവസ്ഥയുടെ പശ്ചാത്തലത്തിൽ കുവൈറ്റ് സൈന്യം അതീവ ജാഗ്രതയിലാണ്. ഏത് തരത്തിലുള്ള അപ്രതീക്ഷിത ആക്രമണങ്ങളെയും നേരിടാൻ രാജ്യം സുസജ്ജമാണെന്ന് സൈനിക വക്താവ് അറിയിച്ചു. അതിർത്തികളിലും ആകാശപരിധിയിലും നിരീക്ഷണം ശക്തമാക്കിയിരിക്കുകയാണ്. ജനങ്ങൾ പരിഭ്രാന്തരാകേണ്ടതില്ലെന്നും ഔദ്യോഗിക അറിയിപ്പുകൾ മാത്രം ശ്രദ്ധിക്കണമെന്നും അധികൃതർ നിർദ്ദേശിച്ചു. വരും ദിവസങ്ങളിലും സുരക്ഷാ പരിശോധനകളും നിരീക്ഷണങ്ങളും കർശനമായി തുടരാനാണ് പ്രതിരോധ മന്ത്രാലയത്തിന്റെ തീരുമാനം. കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/ENPscRffOwo5x6O0PjsEUa?s=cl&p=a&ilr=1