പശ്ചിമേഷ്യയിൽ സംഘർഷം വീണ്ടും രൂക്ഷമാകുമെന്ന ആശങ്ക ശക്തമാക്കി ഇറാനിലെ ഖിഷം ദ്വീപിൽ രണ്ട് മിസൈൽ ആക്രമണങ്ങൾ. ഇറാന്റെ വ്യോമപ്രതിരോധ സംവിധാനങ്ങളെയും ഉപഗ്രഹ നിരീക്ഷണ ശൃംഖലയെയും ലക്ഷ്യമിട്ട് പരിമിതമായ സൈനിക നീക്കം നടത്തിയതായി യുഎസ് പ്രസിഡന്റ് ഡോണൾഡ് ട്രംപ് സ്ഥിരീകരിച്ചു. ആക്രമണത്തിൽ ആളപായമൊന്നും റിപ്പോർട്ട് ചെയ്തിട്ടില്ല. യുഎസും ഇറാനും തമ്മിൽ സമാധാന ധാരണയിലെത്താനുള്ള ശ്രമങ്ങൾ തുടരുന്നതിനിടെയാണ് പുതിയ ആക്രമണവാർത്ത പുറത്തുവന്നത്. ഇതോടെ ആഗോള സാമ്പത്തിക വിപണികളിലും ആശങ്ക പടർന്നു. എണ്ണവില വീണ്ടും ഉയർന്നെങ്കിലും തുടർച്ചയായ രണ്ടാം ആഴ്ചയിലും ക്രൂഡോയിൽ വില മൊത്തത്തിൽ നഷ്ടത്തിലാണ്.

ആക്രമണവാർത്തയ്ക്ക് പിന്നാലെ എണ്ണവിലയിൽ ചലനം

യുഎസ് സൈനിക നടപടി കൂടുതൽ ശക്തമാകുമെന്ന ആശങ്കയും പണപ്പെരുപ്പ ഭീതിയുമാണ് എണ്ണവില ഉയരാൻ കാരണമായത്. യുഎസ് ഡബ്ല്യുടിഐ ക്രൂഡോയിൽ വില 0.34 ശതമാനം ഉയർന്ന് ബാരലിന് 90.38 ഡോളറിലെത്തി. ബ്രെന്റ് ക്രൂഡോയിൽ 98.32 ഡോളറിലും യുഎഇയുടെ മർബൻ ക്രൂഡോയിൽ 99.17 ഡോളറിലുമാണ് വ്യാപാരം നടന്നത്. അതേസമയം, ട്രംപിന്റെ റിപ്പബ്ലിക്കൻ പാർട്ടിക്ക് ഇടക്കാല തിരഞ്ഞെടുപ്പിൽ നേരിട്ട തിരിച്ചടിയും യുദ്ധം അവസാനിപ്പിക്കാനുള്ള നയതന്ത്ര നീക്കങ്ങളും നേരത്തെ എണ്ണവിലയിൽ ഇടിവുണ്ടാക്കിയിരുന്നു. ചർച്ചകൾ തുടരുകയാണെന്ന യുഎസ് പ്രതികരണം വിപണികൾക്ക് നേരിയ ആശ്വാസം നൽകുന്നുണ്ട്.

യുഎസിലെ തൊഴിൽ കണക്കുകൾ പലിശനിരക്ക് ആശങ്ക ഉയർത്തുന്നു

അമേരിക്കയിലെ ഒക്ടോബറിലെ തൊഴിൽ വിപണി കണക്കുകളും സാമ്പത്തിക രംഗത്ത് പുതിയ ചർച്ചകൾക്ക് വഴിയൊരുക്കി. സാമ്പത്തിക വിദഗ്ധർ പ്രതീക്ഷിച്ചതിലും 59,000 അധികം തൊഴിലവസരങ്ങളാണ് മാസത്തിൽ സൃഷ്ടിക്കപ്പെട്ടത്. ആകെ 1,65,000 പുതിയ തൊഴിലുകളാണ് റിപ്പോർട്ട് ചെയ്തത്. തൊഴിൽ വിപണിയിലെ ഈ മുന്നേറ്റം ഡിസംബർ 9-ന് നടക്കുന്ന ഫെഡറൽ റിസർവ് യോഗത്തിൽ പലിശനിരക്ക് 0.25 ശതമാനം വർധിപ്പിക്കാനുള്ള സാധ്യത 76 ശതമാനമായി ഉയർത്തി. ഇതിന് പിന്നാലെ 10 വർഷ കാലാവധിയുള്ള യുഎസ് കടപ്പത്രങ്ങളുടെ ആദായം 4.855 ശതമാനത്തിലെത്തി. പലിശനിരക്ക് ഉയരാനുള്ള സാധ്യത ഓഹരി വിപണിക്കും സ്വർണത്തിനും സമ്മർദമുണ്ടാക്കുമെന്നാണ് വിലയിരുത്തൽ.

സ്വർണവില താഴേക്ക്; കേരളത്തിലും ഇടിവ്

യുഎസിലെ മികച്ച തൊഴിൽ കണക്കുകൾ പുറത്തുവന്നതോടെ രാജ്യാന്തര വിപണിയിൽ സ്വർണവിലയും ഇടിഞ്ഞു. ഒരു ഘട്ടത്തിൽ ഔൺസിന് 4,117 ഡോളർ വരെ ഉയർന്ന വില പിന്നീട് 4,031 ഡോളറിലേക്ക് താഴ്ന്നു. വ്യാപാരം അവസാനിക്കുമ്പോൾ വില 4,065 ഡോളറിലായിരുന്നു. ആഗോള വിപണിയിലെ ഈ മാറ്റത്തിന്റെ പ്രതിഫലനമായി കേരളത്തിലും സ്വർണവില കുറഞ്ഞു. ഗ്രാമിന് 235 രൂപയുടെ ഇടിവാണ് രേഖപ്പെടുത്തിയത്. വാരാന്ത്യമായതിനാൽ ശനി, ഞായർ ദിവസങ്ങളിൽ രാജ്യാന്തര വിപണിയിൽ സ്വർണവ്യാപാരം ഉണ്ടാകില്ല.