UAE medicine side effects; മരുന്നുകൾ കഴിച്ചതിനെത്തുടർന്ന് സംശയാസ്പദമായ പാർശ്വഫലങ്ങൾ അനുഭവപ്പെടുന്ന യുഎഇ നിവാസികൾ ഇക്കാര്യം ആരോഗ്യ അധികൃതരെ അറിയിക്കണമെന്ന് നിർദ്ദേശം. മരുന്ന് സുരക്ഷ വർദ്ധിപ്പിക്കുന്നതിന്റെ ഭാഗമായി രാജ്യവ്യാപകമായി സംഘടിപ്പിക്കുന്ന ബോധവൽക്കരണ ക്യാമ്പയിന്റെ ഭാഗമായാണ് അധികൃതർ ഇക്കാര്യം വ്യക്തമാക്കിയത്. എമിറേറ്റ്‌സ് ഡ്രഗ് എസ്റ്റാബ്ലിഷ്‌മെന്റ്, അഞ്ച് പ്രധാന ആരോഗ്യ അധികൃതരുമായി സഹകരിച്ച് ‘സ്‌പീക്ക് അപ്പ് .. സ്റ്റേ സേഫ്’ എന്ന ക്യാമ്പയിന് തുടക്കം കുറിച്ചു. രോഗികൾ, പരിചരിക്കുന്നവർ, ആരോഗ്യ പ്രവർത്തകർ എന്നിവർ മരുന്നുകൾ മൂലമുണ്ടാകുന്ന പാർശ്വഫലങ്ങളെക്കുറിച്ച് വിവരങ്ങൾ പങ്കുവെക്കാൻ ഈ ക്യാമ്പയിൻ പ്രോത്സാഹിപ്പിക്കുന്നു. നവംബർ 2 മുതൽ 8 വരെ നടക്കുന്ന ആഗോള സംരംഭമായ ‘മെഡ്‌സേഫ്റ്റി വീക്ക് 2026’ -ന്റെ ഭാഗമായാണ് നവംബർ 4 ബുധനാഴ്ച ഈ ക്യാമ്പയിൻ പ്രഖ്യാപിച്ചത്. ഒരു മരുന്ന് അംഗീകാരം ലഭിച്ചതിന് ശേഷവും അത് ഉപയോഗിക്കുമ്പോൾ ഉണ്ടാകുന്ന സുരക്ഷാ പ്രശ്നങ്ങൾ കണ്ടെത്താൻ ഇത്തരം റിപ്പോർട്ടുകൾ സഹായിക്കുമെന്ന് അധികൃതർ അറിയിച്ചു. മരുന്നുകളുടെയും മറ്റ് മെഡിക്കൽ ഉൽപ്പന്നങ്ങളുടെയും പാർശ്വഫലങ്ങൾ റിപ്പോർട്ട് ചെയ്യാൻ നിവാസികൾക്ക് ‘EDE DAWA’ എന്ന സ്മാർട്ട് ടൂൾ ഉപയോഗിക്കാം. ആളുകൾക്ക് തങ്ങളുടെ അനുഭവങ്ങൾ എളുപ്പത്തിൽ സമർപ്പിക്കാൻ സഹായിക്കുന്ന രീതിയിലാണ് ഈ ടൂൾ രൂപകൽപ്പന ചെയ്തിരിക്കുന്നത്. തുടർന്ന്, വിദഗ്ധർ ഈ റിപ്പോർട്ടുകൾ അവലോകനം ചെയ്യുകയും ആവശ്യമായ നടപടികൾ സ്വീകരിക്കുകയും ചെയ്യും. ഉപ്‌സാല മോണിറ്ററിംഗ് സെന്ററുമായുള്ള സഹകരണത്തോടെയാണ് ഈ ടൂൾ വികസിപ്പിച്ചിരിക്കുന്നത്. വിപണിയിലുള്ള മരുന്നുകളുടെ സുരക്ഷ തുടർച്ചയായി നിരീക്ഷിക്കാൻ ഇത് സഹായിക്കുന്നു.
ഒരു മരുന്ന് വിപണിയിൽ എത്തിയതോടെ അതിന്റെ ഉത്തരവാദിത്തം അവസാനിക്കുന്നില്ലെന്ന് എമിറേറ്റ്‌സ് ഡ്രഗ് എസ്റ്റാബ്ലിഷ്‌മെന്റിലെ മെഡിക്കൽ പ്രോഡക്ട്സ് റെഗുലേഷൻ സെക്ടർ ആക്ടിംഗ് എക്‌സിക്യൂട്ടീവ് ഡയറക്ടർ ഡോ. റുഖയ്യ അഖീൽ അൽ ബസ്താകി വ്യക്തമാക്കി. മരുന്ന് ഉപയോഗിക്കുന്നതിലൂടെ പുതിയ വിവരങ്ങൾ ലഭ്യമാകുമ്പോൾ, അതിന്റെ സുരക്ഷ നിരീക്ഷിക്കുന്നത് തുടരേണ്ടത് അത്യാവശ്യമാണ്. രോഗികളിൽ നിന്നും ആരോഗ്യ പ്രവർത്തകരിൽ നിന്നും ലഭിക്കുന്ന റിപ്പോർട്ടുകൾ ശാസ്ത്രീയ തെളിവുകൾക്കൊപ്പം വിശകലനം ചെയ്താണ് അധികൃതർ തുടർനടപടികൾ സ്വീകരിക്കുന്നത്. മരുന്ന് സുരക്ഷാ നിരീക്ഷണ സംവിധാനം കാര്യക്ഷമമാക്കാൻ റെഗുലേറ്ററി അധികൃതർ, ആരോഗ്യ പ്രവർത്തകർ, ഫാർമസ്യൂട്ടിക്കൽ കമ്പനികൾ, രോഗികൾ എന്നിവരുടെ കൂട്ടായ സഹകരണം ആവശ്യമാണെന്നും അവർ കൂട്ടിച്ചേർത്തു.
EDE, ആരോഗ്യ-രോഗപ്രതിരോധ മന്ത്രാലയം (MoHAP), എമിറേറ്റ്‌സ് ഹെൽത്ത് സർവീസസ് (EHS), ദുബായ് ഹെൽത്ത് അതോറിറ്റി (DHA), അബുദാബി പൊതുജനാരോഗ്യ വിഭാഗം (DoH), ഷാർജ ഹെൽത്ത് അതോറിറ്റി എന്നിവർ ഈ ക്യാമ്പയിന്റെ ഭാഗമാണ്. ‘പാർശ്വഫലങ്ങൾ – അവഗണിക്കേണ്ട, റിപ്പോർട്ട് ചെയ്യൂ!’ എന്ന പ്രമേയത്തിലാണ് ഈ വർഷത്തെ മെഡ്‌സേഫ്റ്റി വീക്ക് നടക്കുന്നത്. ഇതിന്റെ ഭാഗമായി ആരോഗ്യ പ്രവർത്തകർക്കായി വെർച്വൽ വർക്ക്‌ഷോപ്പുകളും, ഷാർജ സർവകലാശാലയിലെ വിദ്യാർത്ഥികൾക്കായി പ്രത്യേക ക്ലാസുകളും സംഘടിപ്പിക്കുന്നുണ്ട്. കൂടാതെ, ഫാർമസ്യൂട്ടിക്കൽ കമ്പനികൾക്കായി മരുന്ന് സുരക്ഷാ മാനദണ്ഡങ്ങളെക്കുറിച്ച് വെബിനാറുകളും നടത്തും. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
