Houthi attack drone attack; സൗദി അറേബ്യയുടെ തന്ത്രപ്രധാനമായ ഈസ്റ്റ്–വെസ്റ്റ് ക്രൂഡ് ഓയിൽ പൈപ്പ്‌ലൈനും റിയാദ് അന്താരാഷ്ട്ര വിമാനത്താവളവും ലക്ഷ്യമിട്ട് യെമനിലെ ഹൂതി വിമതരുടെ ശക്തമായ ആക്രമണം. ക്രൂഡ് ഓയിൽ പൈപ്പ്‌ലൈനിലെ പമ്പിങ് സ്റ്റേഷനുകൾ ആക്രമണത്തിൽ തകർന്നു. റിയാദ് രാജ്യാന്തര വിമാനത്താവളത്തിന് നേരെ എത്തിയ മൂന്ന് ഡ്രോണുകൾ ആകാശത്തുവെച്ചുതന്നെ തകർത്തതായി സൗദി സഖ്യസേന അറിയിച്ചു. ഇതിനിടെ, യെമനിൽ സൗദിയുടെ ആയുധ സംഭരണ കേന്ദ്രം ആക്രമിച്ചതായി ഹൂതികൾ അവകാശപ്പെട്ടു. ഹൂതി ആക്രമണത്തിന് പിന്നാലെ യെമൻ തലസ്ഥാനമായ സനായിൽ സൗദി സഖ്യസേന വ്യോമാക്രമണം ശക്തമാക്കി. ഹൂതികൾ ബാലിസ്റ്റിക് മിസൈലുകൾ വിക്ഷേപിക്കാൻ ഉപയോഗിച്ചിരുന്ന ലോഞ്ചറുകളും ഭൂഗർഭ തുരങ്കങ്ങളും ആയുധ സംഭരണശാലകളും വ്യോമാക്രമണത്തിൽ തകർത്തു. ഇതിനുപുറമെ, വിമതർ തമ്പടിച്ചിരുന്ന ഒളിത്താവളങ്ങളും പരിശീലന ക്യാമ്പുകളും സഖ്യസേന ബോംബിട്ട് നശിപ്പിച്ചു. മേഖലയിലെ സുരക്ഷാ ഭീഷണി നേരിടാൻ സൗദി അറേബ്യക്ക് സൈനിക സഹായം നൽകാൻ ഈജിപ്ത് തീരുമാനിച്ചു. അതേസമയം, പശ്ചിമേഷ്യയിലെ സംഘർഷങ്ങൾക്ക് അയവുവരുത്താൻ മക്ക സൈനിക ഉടമ്പടിയിലെ സഖ്യരാജ്യങ്ങളായ സൗദി, തുർക്കി, പാക്കിസ്ഥാൻ പ്രതിനിധികൾ ഇറാൻ തലസ്ഥാനമായ ടെഹ്‌റാനിലെത്തി. ഉടമ്പടി നിലവിൽ വന്നതിന് ശേഷം ആദ്യമായാണ് ഈ ത്രിരാഷ്ട്ര സംഘം ഇറാനുമായി ചർച്ച നടത്തുന്നത്. സൗദി പ്രതിരോധ മന്ത്രി ഖാലിദ് ബിൻ സൽമാൻ, പാക്കിസ്ഥാൻ സൈനിക മേധാവി ജനറൽ അസീം മുനീർ, തുർക്കി ഇന്റലിജൻസ് മേധാവി ഇബ്രാഹിം കാലിൻ എന്നിവരടങ്ങുന്ന ഉന്നതതല സംഘമാണ് ചർച്ചകൾക്ക് നേതൃത്വം നൽകുന്നത്. ഇതിനുപുറമെ, മേഖലയിലെ പുതിയ സംഭവവികാസങ്ങൾ ചർച്ച ചെയ്യുന്നതിനായി റഷ്യൻ പ്രസിഡന്റ് വ്ലാഡിമിർ പുട്ടിൻ മോസ്കോയിൽ ഇറാൻ പ്രസിഡന്റ് മസൂദ് പെസെഷ്കിയാൻ, ഖത്തർ അമീർ ഷെയ്ഖ് തമീം ബിൻ ഹമദ് അൽ താനി എന്നിവരുമായി ഇന്ന് കൂടിക്കാഴ്ച നടത്തും.