Middle East Conflict; പശ്ചിമേഷ്യയിൽ യുദ്ധഭീതി ശക്തമാകുന്നതിനിടെ, തന്ത്രപ്രധാനമായ നീക്കങ്ങളുമായി റഷ്യ. ദക്ഷിണ ഇറാനിലെ ബുഷെഹർ ആണവനിലയത്തിൽ ജോലി ചെയ്തിരുന്ന റഷ്യൻ സാങ്കേതിക വിദഗ്ധരെയും ഉദ്യോഗസ്ഥരെയും അടിയന്തരമായി ഒഴിപ്പിക്കുന്ന നടപടികൾ റഷ്യ ആരംഭിച്ചു. ഒക്ടോബർ അവസാനത്തോടെ മേഖലയിൽ വലിയൊരു സൈനിക ആക്രമണം ഉണ്ടായേക്കുമെന്ന സൂചനകളെത്തുടർന്നാണ് ഈ നീക്കം. ഒക്ടോബർ 22, 23 തീയതികളിൽ റഷ്യൻ വ്യോമസേനയുടെ ഇല്യുഷിൻ (Il-76TD) ഉൾപ്പെടെയുള്ള കൂറ്റൻ സൈനിക ചരക്ക് വിമാനങ്ങൾ ബുഷെഹറിലെ വ്യോമകേന്ദ്രത്തിൽ ഇറങ്ങിയതായി ഫ്ലൈറ്റ് ട്രാക്കിങ് ഡേറ്റകൾ സ്ഥിരീകരിക്കുന്നു. ഈ വിമാനങ്ങൾ ജീവനക്കാരെ കൊണ്ടുപോകാൻ മാത്രമാണോ അതോ ഇറാൻ സൈന്യത്തിന് അത്യാധുനിക ആയുധങ്ങൾ കൈമാറാൻ കൂടി എത്തിയതാണോ എന്നത് വലിയ ദുരൂഹത സൃഷ്ടിക്കുന്നുണ്ട്. ആണവനിലയം ലക്ഷ്യമിട്ട് വരാനിരിക്കുന്ന ആക്രമണങ്ങളെ ഭയന്നാണ് റഷ്യൻ ആണവോർജ കോർപറേഷനായ ‘റോസാറ്റം’ തങ്ങളുടെ ജീവനക്കാരെ തിരികെ വിളിക്കുന്നത്. ഇതാദ്യമായല്ല ബുഷെഹറിൽ നിന്ന് റഷ്യ ജീവനക്കാരെ പിൻവലിക്കുന്നത്. നേരത്തെ യുഎസ്-ഇസ്രയേൽ സംയുക്ത സൈനിക നീക്കം ആരംഭിച്ച ഘട്ടങ്ങളിലെല്ലാം റഷ്യ സമാനമായ രീതിയിൽ വിദഗ്ധരെ സുരക്ഷിത കേന്ദ്രങ്ങളിലേക്ക് മാറ്റിയിരുന്നു. ആണവനിലയം നേരിട്ട് ആക്രമിക്കപ്പെടാനുള്ള സാധ്യത മുന്നിൽ കണ്ടുള്ള മുൻകരുതലാണ് ഈ പിന്മാറ്റം. യുദ്ധഭീതി വർധിച്ചതോടെ ഗൾഫ് മേഖലയിൽ നിന്ന് പ്രമുഖരും നയതന്ത്രജ്ഞരും രാജകുടുംബാംഗങ്ങളും സുരക്ഷിത താവളങ്ങൾ തേടി പലായനം തുടങ്ങി. കഴിഞ്ഞ 48 മണിക്കൂറിനുള്ളിൽ സ്വകാര്യ വിമാനങ്ങളുടെ പറക്കലിൽ വൻ വർധനവാണ് ഉണ്ടായിരിക്കുന്നത്. യുഎസ് പ്രസിഡന്റ് ഡോണൾഡ് ട്രംപിന്റെ സമീപകാല പ്രസ്താവനകളും സാഹചര്യത്തിന്റെ ഗൗരവം വർധിപ്പിക്കുന്നു. “ഇറാന്റെ കാര്യത്തിൽ വളരെ വേഗത്തിൽ തന്നെ ഒരു തീരുമാനമുണ്ടാകും” എന്ന ട്രംപിന്റെ വാക്കുകൾ വലിയൊരു സൈനിക നീക്കത്തിലേക്കാണ് വിരൽ ചൂണ്ടുന്നത്. റഷ്യയുടെ ഈ നീക്കങ്ങളെ അതീവ ജാഗ്രതയോടെയാണ് ഇസ്രയേലും യുക്രെയ്നും വീക്ഷിക്കുന്നത്. റഷ്യയും ഇറാനും തമ്മിലുള്ള സൈനിക-സാങ്കേതിക സഹകരണം തങ്ങളുടെ സുരക്ഷയെ ബാധിക്കുമെന്ന ഭീതി ഇവർക്കുണ്ട്. ഷാഹെദ് ഡ്രോണുകൾ ഉൾപ്പെടെയുള്ള ആയുധങ്ങൾ റഷ്യയ്ക്ക് നൽകുന്നതിലൂടെ യുക്രെയ്നും, തങ്ങളുടെ പ്രദേശം ലക്ഷ്യമാക്കി ആയുധങ്ങൾ ഇറാനിലെത്തുന്നതിലൂടെ ഇസ്രയേലും കടുത്ത ആശങ്കയിലാണ്.
ഒക്ടോബർ അവസാന വാരത്തിൽ പശ്ചിമേഷ്യ വലിയൊരു സൈനിക സംഘർഷത്തിലേക്ക് നീങ്ങുകയാണെന്ന സന്ദേശമാണ് ഈ സംഭവവികാസങ്ങൾ നൽകുന്നത്. വരും ദിവസങ്ങളിലെ ഔദ്യോഗിക വിവരങ്ങൾക്കായി ലോകരാജ്യങ്ങൾ ഉറ്റുനോക്കുകയാണ്.