UAE fake job offer; വ്യാജ തൊഴിൽ വാഗ്ദാനങ്ങൾക്കെതിരെ ഉദ്യോഗാർത്ഥികൾക്ക് കർശന മുന്നറിയിപ്പുമായി യുഎഇ മാനവ വിഭവശേഷി, സ്വദേശിവൽക്കരണ മന്ത്രാലയം. തൊഴിൽ വാഗ്ദാനങ്ങളുമായി മുന്നോട്ട് പോകുന്നതിന് മുൻപ് റിക്രൂട്ടറുടെ ആധികാരികത പരിശോധിക്കാൻ ഉദ്യോഗാർത്ഥികളെ സഹായിക്കുന്ന അഞ്ച് പ്രധാന അപായ സൂചനകളാണ് മന്ത്രാലയം പുറത്തുവിട്ടത്. നിയമന നടപടികളുടെ ഭാഗമായി ബാങ്ക് അക്കൗണ്ട് തുടങ്ങാനോ, സാമ്പത്തിക വിവരങ്ങൾ പങ്കുവെക്കാനോ, പണം കൈമാറാനോ ആവശ്യപ്പെടുന്ന റിക്രൂട്ടർമാരെ പ്രത്യേകം കരുതിയിരിക്കണമെന്ന് മന്ത്രാലയം നിർദ്ദേശിച്ചു.

പൊതുജനങ്ങൾക്കായി പുറപ്പെടുവിച്ച ജാഗ്രതാ നിർദ്ദേശത്തിൽ, വ്യാജ ജോബ് ഓഫറുകളെ സൂചിപ്പിക്കുന്ന അഞ്ച് പ്രവണതകളാണ് മന്ത്രാലയം ചൂണ്ടിക്കാട്ടിയത്.

1. ബാങ്ക് അക്കൗണ്ട് തുടങ്ങാൻ ആവശ്യപ്പെടുക: റിക്രൂട്ട്മെന്റ് നടപടികളുടെ ഭാഗമായി ഉദ്യോഗാർത്ഥിയുടെ സ്വന്തം പേരിൽ ഒരു ബാങ്ക് അക്കൗണ്ട് ആരംഭിക്കാൻ റിക്രൂട്ടർ ആവശ്യപ്പെടുന്നത്.
2. ബാങ്കിംഗ് വിവരങ്ങൾ ചോദിക്കുക: സ്ഥിരീകരിക്കാത്ത വ്യക്തികൾക്കോ സ്ഥാപനങ്ങൾക്കോ ബാങ്ക് അക്കൗണ്ട് വിവരങ്ങൾ നൽകാൻ ആവശ്യപ്പെടുന്നത്.
3. റിക്രൂട്ട്മെന്റ് ഫീസ് ഈടാക്കുക: ജോലി ഉറപ്പാക്കുന്നതിനോ നിയമന നടപടികൾ പൂർത്തിയാക്കുന്നതിനോ പകരമായി തൊഴിലുടമയോ റിക്രൂട്ടറോ പണം ആവശ്യപ്പെടുന്നത്.
4. പണമിടപാടുകൾക്കായി ഉദ്യോഗാർത്ഥിയുടെ അക്കൗണ്ട് ഉപയോഗിക്കുക: ഉദ്യോഗാർത്ഥിയുടെ ബാങ്ക് അക്കൗണ്ടിലേക്ക് പണം സ്വീകരിക്കാനോ മറ്റ് അക്കൗണ്ടുകളിലേക്ക് പണം കൈമാറാനോ ആവശ്യപ്പെടുന്നത്.
5. മെസ്സേജിംഗ് ആപ്പുകൾ വഴി മാത്രം ആശയവിനിമയം: ഔദ്യോഗിക കോൺടാക്റ്റ് വിവരങ്ങളോ സ്വതന്ത്രമായി പരിശോധിക്കാവുന്ന വിവരങ്ങളോ നൽകാൻ വിസമ്മതിക്കുകയും, മെസ്സേജിംഗ് പ്ലാറ്റ്‌ഫോമുകൾ വഴി മാത്രം ആശയവിനിമയം നടത്താൻ നിർബന്ധിക്കുകയും ചെയ്യുന്നത്.

ഇത്തരം ആവശ്യങ്ങൾ ശ്രദ്ധയിൽപ്പെട്ടാൽ ഉടൻ തന്നെ നിയമന നടപടികൾ നിർത്തിവെക്കാനും തൊഴിലുടമയുടെയും ജോബ് ഓഫറിന്റെയും ആധികാരികത പരിശോധിക്കാനും മന്ത്രാലയം ഊന്നിപ്പറഞ്ഞു. ജോബ് ഓഫറിന്റെ നിയമസാധുത ഉറപ്പാക്കുന്നതിന് മുൻപ് സ്ഥിരീകരിക്കാത്ത കക്ഷികൾക്ക് സാമ്പത്തിക വിവരങ്ങൾ കൈമാറുകയോ പണമടയ്ക്കുകയോ ചെയ്യരുതെന്നും ഉദ്യോഗാർത്ഥികൾക്ക് നിർദ്ദേശം നൽകിയിട്ടുണ്ട്.

ജോബ് ഓഫറുകളുടെ ആധികാരികത എങ്ങനെ പരിശോധിക്കാം?

മന്ത്രാലയത്തിന്റെ സംവിധാനത്തിലൂടെ നൽകുന്ന നിയമാനുസൃതമായ ജോബ് ഓഫറുകളിൽ അവയുടെ ആധികാരികത പരിശോധിക്കുന്നതിനായി ഒരു സീരിയൽ നമ്പറും ബാർകോഡും ഉണ്ടായിരിക്കുമെന്ന് MoHRE വ്യക്തമാക്കി. മന്ത്രാലയത്തിന്റെ ഔദ്യോഗിക വെബ്‌സൈറ്റ്, ‘MOHRE UAE’ മൊബൈൽ ആപ്ലിക്കേഷൻ, അല്ലെങ്കിൽ 600590000 എന്ന കസ്റ്റമർ സർവീസ് നമ്പർ എന്നിവ വഴി ഉദ്യോഗാർത്ഥികൾക്ക് ജോബ് ഓഫറുകൾ പരിശോധിക്കാവുന്നതാണ്. ഉദ്യോഗാർത്ഥികളെ കബളിപ്പിച്ച് പണം തട്ടാനോ നിർണ്ണായകമായ വ്യക്തിഗത, സാമ്പത്തിക വിവരങ്ങൾ കൈക്കലാക്കാനോ വ്യാജ ജോബ് ഓഫറുകൾ ഉപയോഗിക്കുന്നതായി മന്ത്രാലയം നേരത്തെ തന്നെ മുന്നറിയിപ്പ് നൽകിയിരുന്നു.

26 ലക്ഷത്തിലധികം ഉപഭോക്തൃ സേവന ഇടപെടലുകൾ

2026 മൂന്നാം പാദത്തിൽ (ജൂലൈ – സെപ്റ്റംബർ) മന്ത്രാലയത്തിന്റെ ഔദ്യോഗിക ആശയവിനിമയ ചാനലുകൾ വ്യാപകമായി ഉപയോഗിക്കപ്പെട്ടതായി വ്യക്തമാക്കുന്ന ‘ലേബർ മാർക്കറ്റ് ഒബ്സർവേറ്ററി’ കണക്കുകൾക്ക് ഒപ്പമാണ് ഈ മുന്നറിയിപ്പും പുറത്തുവിട്ടത്. ഈ കാലയളവിൽ മൂന്ന് പ്രധാന ചാനലുകളിലൂടെയായി ആകെ 2,609,484 ഉപഭോക്തൃ ഇടപെടലുകളാണ് മന്ത്രാലയം രേഖപ്പെടുത്തിയത്. ഇതിൽ കോൺടാക്റ്റ് സെന്റർ വഴിയുള്ള 1,907,676 ടെലിഫോൺ ഇടപെടലുകളും, ഇമെയിൽ, ലൈവ് ചാറ്റ്, വാട്ട്‌സ്ആപ്പ് എന്നിവ ഉൾപ്പെടുന്ന ‘തവാസുൽ’സംവിധാനം വഴിയുള്ള 351,594 ഇടപെടലുകളും, ‘കസ്റ്റമർ വോയ്സ്’ ചാനൽ വഴിയുള്ള 350,214 ഇടപെടലുകളും ഉൾപ്പെടുന്നു. മൂന്ന് മാസത്തിനിടെ വിപുലമായ ബോധവൽക്കരണ കാമ്പയിനുകളിലൂടെയും പദ്ധതികളിലൂടെയും 27,386,573 ടെക്സ്റ്റ്, ഇലക്ട്രോണിക് സന്ദേശങ്ങളും മന്ത്രാലയം അയച്ചു. കൂടാതെ, 7,013,360 കമ്പനി അക്കൗണ്ട് സ്റ്റേറ്റ്‌മെന്റുകൾ നൽകുകയും പ്രിഫറൻഷ്യൽ കസ്റ്റമർ സർവീസുകളിലൂടെ 51,098 ഇടപെടലുകൾ രേഖപ്പെടുത്തുകയും ചെയ്തു. ഈ പാദത്തിൽ ‘കസ്റ്റമർ ഫസ്റ്റ്’ ഫോറങ്ങളിൽ 3,773 തൊഴിലുടമകൾ പങ്കെടുക്കുകയും മന്ത്രാലയം 26 കസ്റ്റമർ കൗൺസിലുകൾ സംഘടിപ്പിക്കുകയും ചെയ്തതായും കണക്കുകൾ വ്യക്തമാക്കുന്നു. നിർണ്ണായക വിവരങ്ങൾ പങ്കുവെക്കുന്നതിനോ നിയമന നടപടികൾ പൂർത്തിയാക്കുന്നതിനോ മുൻപ് തൊഴിൽ വാഗ്ദാനങ്ങൾ പരിശോധിക്കാനും വ്യക്തത വരുത്താനും മന്ത്രാലയത്തിന്റെ ഔദ്യോഗിക ആശയവിനിമയ ചാനലുകൾ ഉപയോഗിക്കണമെന്ന് MoHRE ഉദ്യോഗാർത്ഥികളോട് അഭ്യർത്ഥിച്ചു. യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി. ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t