Pravasi Varthakal

വോയ്‌സ് സാങ്കേതികവിദ്യയിൽ പ്രവർത്തിക്കുന്ന ചെറുതും എന്നാൽ മികച്ചതുമായ എഐ സ്റ്റാർട്ടപ്പായ പ്ലേ എഐയെ മെറ്റ പ്ലാറ്റ്‌ഫോംസ് ഇൻ‌കോർപ്പറേറ്റഡ് ഏറ്റെടുത്തു. ജനറേറ്റീവ് വോയ്‌സ് സാങ്കേതികവിദ്യയിലെ കഴിവുകൾ ശക്തിപ്പെടുത്തുക എന്ന ലക്ഷ്യത്തോടെയാണ് കാലിഫോർണിയ ആസ്ഥാനമായുള്ള പ്ലേ എഐയെ മെറ്റ ഏറ്റെടുത്തത്. ഈ ഇടപാടിലൂടെ മുഴുവൻ പ്ലേ എഐ ടീമും അടുത്ത ആഴ്ചയോടെ മെറ്റയിൽ ചേരും. അവിടെ അവർ ഗൂഗിളിലെ മുൻ സീനിയർ സ്പീച്ച് എഐ തലവൻ ജോഹാൻ ഷാൽക്വിക്കിൻറെ കീഴിൽ പ്രവർത്തിക്കാൻ തുടങ്ങും. അടുത്തിടെയാണ് ജോഹാൻ ഷാൽക്വിക്കും മെറ്റയിൽ എത്തിയത്.

നൂതന വോയ്‌സ് ക്ലോണിംഗ് ടൂളിന് പേരുകേട്ടതാണ് പ്ലേ എഐ. ഇത് ഉപയോക്താക്കളെ സ്വന്തം ശബ്‍ദങ്ങൾ പകർത്താനോ പുതിയ മനുഷ്യസമാന ശബ്‍ദങ്ങൾ സൃഷ്ടിക്കാനോ അനുവദിക്കുന്നു. വെബ്‌സൈറ്റുകൾ, മൊബൈൽ ആപ്പുകൾ, ഫോണുകൾ എന്നിവ ഉൾപ്പെടെയുള്ള ഡിജിറ്റൽ പ്ലാറ്റ്‌ഫോമുകളിൽ ഉടനീളം ഇവ വിന്യസിക്കാൻ കഴിയും. എഐ അധിഷ്‍ഠിത ഇടപെടലിലെ മെറ്റയുടെ വളർന്നുവരുന്ന പദ്ധതികളുമായി അടുത്ത് യോജിക്കുന്ന ഒരു പ്രവർത്തനമാണിത്. മെറ്റ എഐ, എഐ ക്യാരക്ടറുകൾ, വെയറബിൾസ് വിഭാഗം എന്നിവയുൾപ്പെടെ നിലവിലുള്ള എഐ സംരംഭങ്ങൾക്ക് പ്ലേ എഐയുടെ സാങ്കേതികവിദ്യ മികച്ച രീതിയിൽ പൊരുത്തപ്പെടുന്നതായിട്ടാണ് മെറ്റ കാണുന്നതെന്ന് ബ്ലൂംബെർഗ് റിപ്പോർട്ട് ചെയ്യുന്നു. അതേസമയം ഈ ഏറ്റെടുക്കലിൻറെ സാമ്പത്തിക നിബന്ധനകൾ വെളിപ്പെടുത്തിയിട്ടില്ല.

ആർട്ടിഫിഷ്യൽ ഇൻറലിജൻസ് മേഖലയിൽ അടുത്തകാലത്തായി മെറ്റ നടത്തുന്ന ശക്തമായ വിപുലീകരണ ശ്രമങ്ങളുടെയും നിരവധി റിക്രൂട്ട്മെൻറുകളുടെയും ഏറ്റവും പുതിയ അധ്യായങ്ങളിൽ ഒന്നാണ് ഈ ഏറ്റെടുക്കൽ. മനുഷ്യരേക്കാൾ മികച്ച കൃത്രിമ ഇൻറലിജൻസ് സംവിധാനങ്ങൾ നിർമ്മിക്കുക എന്ന ലക്ഷ്യത്തോടെ കമ്പനി അടുത്തിടെ ഒരു സൂപ്പർ ഇൻറലിജൻസ് ലാബ് ആരംഭിച്ചിരുന്നു. ജൂണിൽ എഐ ഡാറ്റ ലേബലിംഗിന് പേരുകേട്ട സ്റ്റാർട്ടപ്പായ സ്കെയിൽ എഐയിൽ മെറ്റ 14.3 ബില്യൺ ഡോളർ നിക്ഷേപം നേടി. പുതിയ ലാബിനെ നയിക്കാൻ അതിൻറെ സിഇഒ അലക്‌സാണ്ടർ വാങിനെയും കൊണ്ടുവന്നു.

എതിരാളികളായ കമ്പനികളിൽ നിന്ന് പ്രതിഭകളെ കണ്ടെത്തുന്നതിനായി മെറ്റ വൻതോതിൽ നിക്ഷേപം നടത്തിവരികയാണ്. ഓപ്പൺഎഐ, ഗൂഗിൾ ഡീപ് മൈൻഡ്, ആപ്പിൾ തുടങ്ങിയ വമ്പൻ ടെക് കമ്പനികളിലെ എഐ വിദഗ്ധർക്ക് 100 മില്യൺ ഡോളർ വരെ ബോണസ് വാഗ്ദാനം ചെയ്തിട്ടുണ്ടെന്നാണ് റിപ്പോർട്ടുകൾ. ഓപ്പൺഎഐയുടെ ചാറ്റ്ജിപിടി, ജിപിടി-4 എന്നിവയിൽ പ്രവർത്തിച്ച നിരവധി എഞ്ചിനീയർമാരെയും ഗൂഗിൾ ജെമിനി ടീമിലെ പ്രതിഭകളെയും മെറ്റ ഇതിനകം തങ്ങളുടെ കമ്പനിയിൽ എത്തിച്ചുകഴിഞ്ഞു. നൂതന സവിശേഷതകളിൽ പ്രവർത്തിക്കുന്ന ആപ്പിളിൻറെ ഉന്നത എഐ എക്സിക്യൂട്ടീവും ഈ വർഷം മെറ്റയിലേക്ക് എത്തിയതും ശ്രദ്ധേയമാണ്.

പ്ലേ എഐയുടെ വോയ്‌സ് സാങ്കേതികവിദ്യയുടെ സംയോജനം മെറ്റയുടെ പുതിയൊരു ഭാവിയിലേക്കുള്ള നീക്കത്തെയാണ് സൂചിപ്പിക്കുന്നത്. മെറ്റയുടെ ശബ്‍ദവും എഐ സാങ്കേതികവിദ്യയും അടുത്ത ഘട്ടത്തിലേക്ക് കൊണ്ടുപോകുന്നതിനുള്ള മറ്റൊരു പ്രധാന ചുവടുവയ്പ്പായി ഈ ഏറ്റെടുക്കൽ കണക്കാക്കപ്പെടുന്നു.