Pravasi Varthakal

ഗൂഗിൾ പ്ലേ സ്റ്റോറിലെ സുരക്ഷാ ഭീഷണികൾക്കെതിരെ ഗൂഗിൾ ശക്തമായ നടപടികൾ തുടരുന്നു. ഉപയോക്താക്കളുടെ സുരക്ഷയും സ്വകാര്യതയും കണക്കിലെടുത്ത്, അടുത്തിടെ 77 അപകടകരമായ ആപ്പുകൾ കൂടി ഗൂഗിൾ പ്ലേ സ്റ്റോറിൽ നിന്ന് നീക്കം ചെയ്തു. ഈ നടപടി കഴിഞ്ഞ ഒരു വർഷമായി ഗൂഗിൾ നടത്തുന്ന ശുദ്ധീകരണത്തിൻ്റെ ഭാഗമാണ്. ഈ കാലയളവിൽ ഏകദേശം 40 ലക്ഷം ആപ്പുകളാണ് പ്ലേ സ്റ്റോറിൽ നിന്ന് നീക്കം ചെയ്തതെന്നാണ് കണക്ക്. അതായത്, പ്രതിദിനം ശരാശരി 11,000 ആപ്പുകൾ വീതം.

നീക്കം ചെയ്യപ്പെട്ട ആപ്പുകളിൽ പകുതിയിലധികം ഡാറ്റാ സംരക്ഷണ, സ്വകാര്യതാ നിയമങ്ങൾ ലംഘിക്കുന്നവയാണ്. ആപ്പ് ഡെവലപ്പർമാർക്കായി ഗൂഗിൾ കൂടുതൽ കർശനമായ നിയമങ്ങൾ നടപ്പാക്കിയതിൻ്റെ ഫലമായി 2024-ൻ്റെ തുടക്കത്തിൽ പ്ലേ സ്റ്റോറിലെ പകുതിയോളം ആപ്പുകൾ നീക്കം ചെയ്തിരുന്നു. കൂടാതെ, ഈ വർഷം ഏകദേശം 1.55 ലക്ഷം ഡെവലപ്പർ അക്കൗണ്ടുകളും ഗൂഗിൾ ബ്ലോക്ക് ചെയ്തിട്ടുണ്ട്. പ്ലേ സ്റ്റോറിന് പുറത്ത് നിന്ന് ഇൻസ്റ്റാൾ ചെയ്യുന്ന (sideloaded) ആപ്പുകൾക്കെതിരെയും ഗൂഗിൾ ഇപ്പോൾ കർശനമായ നിലപാട് സ്വീകരിക്കുന്നുണ്ട്.

ഒരു ആപ്പ് പ്ലേ സ്റ്റോറിൽ നിന്ന് അപ്രത്യക്ഷമായാൽ അത് ഡെവലപ്പർ നീക്കം ചെയ്തതുകൊണ്ട് മാത്രമല്ല. പലപ്പോഴും നിയമങ്ങൾ ലംഘിച്ചതുകൊണ്ടു കൂടിയാവാം. അങ്ങനെയുള്ള ആപ്പുകൾ നിങ്ങളുടെ ഫോണിൽ നിലവിലുണ്ടെങ്കിൽ അത് പ്രവർത്തിക്കുമെങ്കിലും, ഭാവിയിൽ സുരക്ഷാ അപ്‌ഡേറ്റുകൾ ലഭിക്കില്ല. അതിനാൽ, ഫോണിൻ്റെ സുരക്ഷയ്ക്ക് അത് ഭീഷണിയാകാം.

അപകടകരമായ ആപ്പുകൾ കണ്ടെത്തിയാൽ അത് അൺഇൻസ്റ്റാൾ ചെയ്യാൻ പ്ലേ പ്രൊട്ടക്റ്റ് നിങ്ങളെ അറിയിക്കുമെന്ന് ഗൂഗിൾ വ്യക്തമാക്കിയിട്ടുണ്ട്. അത്തരം അറിയിപ്പുകൾ ലഭിച്ചാൽ ഉടൻതന്നെ ആപ്പ് നീക്കം ചെയ്യുക.

കൂടുതൽ സൗകര്യപ്രദമായ ഉപയോഗത്തിനായി ഗൂഗിൾ ഒരു പുതിയ ഫീച്ചർ പരീക്ഷിക്കുന്നുണ്ട്. ആപ്പിൻ്റെ പേജിൽത്തന്നെ നേരിട്ട് ഒരു ‘അൺഇൻസ്റ്റാൾ’ ബട്ടൺ നൽകുന്നതാണിത്. നിലവിൽ ‘മാനേജ് ആപ്പ്‌സ് ആൻഡ് ഡിവൈസെസ്’ എന്ന ഓപ്ഷനിലൂടെയാണ് ആപ്പുകൾ നീക്കം ചെയ്യുന്നത്. പുതിയ ഫീച്ചർ വരുമ്പോൾ അത് കൂടുതൽ എളുപ്പമാകും.

വിദഗ്ദ്ധരുടെ അഭിപ്രായത്തിൽ, സുരക്ഷിതമായ ഡൗൺലോഡ് ശീലങ്ങൾ വളർത്തിയെടുക്കേണ്ടത് അത്യാവശ്യമാണ്. ഇതിനായി: ആപ്പുകൾ ഡൗൺലോഡ് ചെയ്യുമ്പോൾ അതിൻ്റെ അനുമതികൾ (permissions) ശ്രദ്ധയോടെ വായിക്കുക.ആപ്പിന്റെ അവലോകനങ്ങൾ (reviews) പരിശോധിക്കുക. വിശ്വസനീയരായ ഡെവലപ്പർമാരുടെ ആപ്പുകൾ മാത്രം ഇൻസ്റ്റാൾ ചെയ്യുക.